SAK nukittunersaavoq
Nick Olsen, SAK finalimi arsarluaqaaq Norsaq HC'mut unamminermi 19'inik isertitsilluni
Assammik arsarnermi U16 GM Nuummi ingerlanneqarnerani timersoqatigiiffiit pikkorilluinnartut arlaqarput. Tupaallaataanerpaapput Nagtoralik Paamiuneersut, unammersuarnerup ingerlanerani pikkorissiartuinnarlutik peqataasut. Naggataatigulli SAK, Sisimiut aamma Norsaq HC, Aasiaat finalimi naapittussanngorput.
Nuummi Illorsuarmi Timersortarfimmi dommerit siggartullu pissanganeq aallartippoq. SAK aallartilluarneruvoq unamminerup immikkoortuani siullermi naligeeqalutik. SAK'imi Nick Olsen arsarluaqaaq, immikkoortumi siullermi arfineq-pingasunik isertitsilluni, immikkoortumi siullermi timersoqatigiit isertitaasa affai. Tupinnaqaaq Norsaq HC'imit immikkut paarineqanngimmat. Nikinnermi SAK 16-14'inik siuaqqavoq.
Unamminerup immikkoortuata aappaani allanngortoqanngilaq. SAK ataatsimik marlunnilluunniit siuaqqajuarsinnarpoq. Immikkoortut appaanni Nick Olsen unitsitassaanngilaq. Immikkoortumi tassani aqqanilinnik isertitsivoq - taamaakkaluartoq immikkut assersorneqarani. Tupaallaatissaanngitsumik SAK 30-26'nik pissartanngorpoq.
Unamminermi kisitsisit:
SAK – Norsaq HC 30-26 (16-14)
Mål'ertut: SAK: Nick Olsen 19, Frans Lennert 5, Hans Karl Olsen 3, Nicklas Møller 2, Angutinnguaq Thorleifsen 1.
Norsaq HC’p mål'ertui: Maasi Kristensen 8, Malik Davidsen 7, Rian Qvist 5, Ole Jakobsen 3, Peter B. Christensen 2, Karl Brandt 1.
Dommerit: Oluf Josefsen aamma Poul Olsen.