Tallimariaammik pissartaq
Arnani sisorartartut dronningiat Niviaq Chemnitz Berthelsen angutinilu sisorartartut kunngiat Martin Møller Aasianni GM'imi ajugaaffigisinnaasatik tamakkerpaat
Tallimanngornermi sisoraatinik oqilaniunnermi GM Aasianni ingerlanneqartumi oqilaniuffissat nalinginnaat ingerlanneqarput. Angutit 50 kilometerimik arnallu 30 kilometerimik unammipput. Unammeriaatsit taakkua sisoraatinik oqilaniunnermik pissartanngorniunnerup naammassinerai.
Sukkaqaat. Niviaq Chemnitz Berthelsen, NUP, 30 kilometerit ingerlaarpai atorlugit 1.35,59 tiimit. Silvinnappoq Alida C. Rafaelsen, ASP, taassuma unamminermi ajugaasumit minutsit 21t amerlanerit atorpai. Ingerlaarluni 1.53,27 tiimit. Apuuttu pingajoraat taamalu bronzennattortaraat Naja Marie Kristensen, ASP, atorlugit 1.57,06 tiimit.
Angutini Martin Møller, ASP, qulanngivilluni ajugaaqqippoq. 50 kilometerit ingerlaarpai atorlugit 2.15,15 tiimit. Silvinnappoq Kristian Kristoffersen, ASP, atorlugit 2.22,32 tiimit, bronzemedalia Frederik Petersen, ISP pissarsiaraa atorlugit 2.27,26 minutsit. Karl-Peter Kristensen, ASP, ajugaasussat ilaattut naatsorsuutigisaq aqqutaani uniinnartariaqarpoq.
- Utoqqaanerumaani Hans Rafaelsen, ASP, ingerlalluavippoq. Taanna unammersuarnermi peqatiminit nallerneqarsinnaanngilaq. Arnani Marie Mina Mørch, NSP Nuuk angusassaanngitsoq, Ole Lynge Hansen, Nunatsinni sisorartartut kattuffianni sisoraatinik oqilaniuttartut immikkoortortaanni siulittaasuusoq oqarpoq.
- Meeqqani ASP, Aasiaat sukalanerpaajupput aamma timersoqatigiiffik ersarilluaqaaq. QUP, Qeqertarsuatsiat illoqarfinnit aggersitanit ikinnerusunik unammiartortitsigaluarluni takutitsilluaqaat. Taakku aamerlanerpaanik pissartanngortitsipput silvinnallutillu. Nunaqarfimmiut taama ingerlalluartiginerat nersualaarutaavoq.
- Aka Olsen meeqqani sukalanerpaartaavoq. Kisimiilluni unamminerni tamaginni pissartanngorpoq. Ilagiikkaarluni silvinnalluni, Aka ingerlaarluarneratigut normu 5'imit normu 2'nngoramik, Ole Lynge Hansen oqarpoq.