Illuinnarsuutilik tigusaraat
Inuit 28't Maniitsumi ernguttunit sisamanngormat ullaakkut inimit aniasinneqartut
Påskeferien blev inddraget skærtorsdag morgen for alle fire betjente hos Maniitsoq Maniitsumi politiit sisamaasut ilaasa poorskikkunni sulinngiffeqarnerat sisamanngornermi ullaakkut taamaatinneqariataarpoq, ullaakkut nal. 07.45 politeqarfimmut sianertoqarmat, Maniitsumi ernguttut inuit 28't akornanni angutip ilaata illuinnarsuut issummagu.
Taama oqaluttuarpoq Eigil Lyberth illumi pulaartunik anisitsiniaanermi aammalu illuinnarsuummik piginnittumik illumi najugalimmik maanna tigusaareersumik anisitsiniaanermi aqutsisoq.
- Suna tamarmi pissusissaq naapertorlugu ingerlavoq. Inunnik aniasitsineq inunnik ajoqqusertoqanngitsoq ingerlanneqarpoq. Kisianni suliaq akunnernik arlalinnik sivisussuseqarpoq, ullaaq nalunaaqqutaq arfineq-pingasuniit maannamut 12.30'p tungaanut. Aatsaat oqaluuserinninerput naammasseqqammerparput, Eigil Lyberth oqarpoq aamma oqaluttuaralugu illuinnarsuut angutip tigummisarisimasaa gaspistoliusoq aammali aallaat alla inatsisit naapertorlugit piniartunit kisimi pigineqarsinnaasoq tigusarisimallugu.
- Aap, inuit 28't illumit ajunngitsumik tamaasa anisinniarneri ajornaatsuinnaanngilaq. Tamarmik aalakoortorujussuupput ilaasalu susoqarneraluunniit naluaat. Bussimik attartorpugut inuit issorakkagut paasiniaaffigalutigit misissuiffigalugillu. Inuit illumit ataasiakkaarlugit annissorpagut, ilaatigut uanga nammineq biilikka sulinermut atortariaqarlutigit, Eigil Lyberth oqaluttuarpoq. Taassuma aamma KSN, Nuummi sulianik pinartoqartillugu immikkut ikiuigasuartartut attavigineqarput, pisup imaannaannginneranut tunngatillugu.
- Isumaqatiginninniartup Nuummit illuinnarsuusisartoq telefonikkut attaveqarfigisinnaasimavaa oqaluutiinnarlugulu illuanillu anisinnaasimallugu, uagullu silataanit tigusarinissaanut piareersimavugut. Maannakkorpiaq parnaarussaavoq kingorna killisiorneqassalluni. Maannamuugallartoq oqaatigisinnaanngilara qassinik ukioqarnersoq, ualimut aatsaat nalunaarusiulerutta paasinarsissaaq. Kisianni uanga paasinninnera naapertorlugu unioqqutitsisumik sakkulisarsimasutut unnerluunneqassaaq, Eigil Lyberth oqarpoq.