Nutaanik tv-kanaleqalissaaq
Maajip aallaqqaataani 2012-mi Nuummi innuttaasut tv-kanalinik nutaanik isiginnaarsinnaalissapput, tv-qarfik Greenland Television, GTV-mik taaneqartartoq atulerpat
Qaammat ataasiunngitsorluunniit qaangiuppat Nuummi innuttaasut tv-kanalinik nutaanik isiginnaarsinnaalissapput, Greenland Television, GTV atulerpat.
Tv-qarfik nutaaq kanaliutilinnik arlalinnik isumaqatigiissuteqarsimavoq Nuummilu tuniniaaveqalerluni, dekoderinik pisisoqarsinnaalluni GTV-p aallakaatitaannik isiginnaarniaraanni pigineqartariaqartunik.
Ulluni makkunani GTV-mi atortunik aaqqisuussileruttorpoq taamaalilluni Nuup ilaani maajip aallaqqaataaniit GTV-mit kanalit isiginnaarneqarsinnaalissallutik, anguniarneqarporlu juulip aallaqqaataani inoqutigiit tamarmik isiginnaarsinnaalissasut, dekoderemik kanalinillu isiginnaarniakkaminnik pisisimagunik.
Greenland Television januaarip 30-ani 2012-mi pilersinneqarpoq, ulluinnarnilu aqutsisuuvoq pisortaq Jonas Tetzschner siulersuisullu tassaallutik siulittaasoq Johannes Kyed, Inga Dora G. Markussen kiisalu Erik Palo Jacobsen.
- Kanalinik arlalinnik neqerooruteqarsinnaalernissarput qilanaaraarput taamaalilluta innuttaasut amerlanerusunik toqqagassaqarlutik. Anguniarparput ukiuni tulliuttuni pingasuniit arfinilinni nunatsinni amerlanerpaanut neqerooruteqarsinnaalernissarput, siulersuisuni siulittaasoq Johannes Kyed oqarpoq.
Sapaatip akunnerini tulliuttuni GTV-mit nalunaarutigineqassaaq tv-kanalit suut neqeroorutigineqassanersut kikkullu kanalinik neqerooruteqartuunersut.