MIBB.mi siulittaasunngorpoq

Tallimanngormat Aaja Chemnitz Larsen Kalaallit nunaani Meeqqat illersuisuattut ilisaritinneqarpoq, tamannalu toqqammavigalugu Meeqqat inuunerissut/ Bedre børneliv –mi (MIBB) siulittaasutut ingerlaqqissinnaanani.

Siulersuisut sisamanngornermi unnukkut ataatsimiinnerminni, MIBB-ip siulittaasuata tullia Britta Nielsen Johansen siulittaasussatut ivertinneqarpoq.

Britta Nielsen Johansen inunnik isumaginninnermi siunnersortitut ilinniarsimasuuvoq, ukiorpannilu inunnik isumaginninnermik suliaqarsimalluni. Ukiunilu kingullerni annertunerusumik pinaveersaartitsineq pitsaaliuneq peqqinnerulernissamillu suliniutinik ingerlaqarsimalluni. Brittap suliniut aallartisarneqareersoq, ”Kuseriarnertut siaruarlugu” suliassatut ingerlatassatut pingaarnertut ingerlakkusuppaa, imatullu oqaaseqarluni:

- Soorunami uggornarpoq, Aaja MIBB-p siulersuisuni peqatigiunnaassagatsigu, oqaatigisariaqartorli unaavoq suliassatta ”Kuseriarnertut siaruarlugu” tunngavissartaa piffissami qaammammi kingullermi annertuumik suliarisimammagu – tamannalu pillugu assut qujaffigerusupparput, atorfittaaminilu sulilluarnissaanik kissaallugu, Britta Nielsen Johansen oqarpoq.

Siulittaasup tulliatut ivertinneqarpoq Katrine H. Nathanielsen. Februaarimilu ataatsimeersuarnermi Line Frederiksen aningaaserisutut ivertinneqareernikuuvoq.