Maniitsumut sunniutissat imaassagunarput

Maniitsumi aluminiuliorfissaq inuiaqatigiinnut sunniuteqassaaq. Sunniutissanillu ilisimasaqarneq nassatassat pitsaanngitsut annikillisarnissaannut pitsaasullu siuarsarnissaannut aalajangiisuussaaq.

Taamaattumik naalakkersuisut 2010-mi Islandimut qiviarput aluminiuliorfimmut pissutsini Maniitsumi aluminiuliorfissatut suliniummut assersuunneqarsinnaasunut atatillugu ilisimatusaatiginninnerit qanittukkut ingerlanneqartut ilinniarfigiumallugit.

Islandip kangiani aluminiuliorfimmik suliniutip nassatai - taamalu aamma Maniitsumi aluminiuliorfiliortoqassappat nassatassanik sunik Kalaallit Nunaata eqqumaffiginnittariaqarnera - nalunaarusiami ”Social Impacts of an Aluminium Plant in East Iceland 2002-2008”-mi takutinneqarput.

Ilisimasat taakku Kalaallit Nunaanni aluminiuliorfissamik suliniummut avatangiisinik nalilersuinermi tunngavissat ilaannik pilersitsereerput (takuuk smv.gl).

Assigiissuterpassuit
- Fjardaálimi aluminiuliorfiup Kalaallit Nunaanni suliniummut soqutiginaateqarneranut pissutaasoq tassaavoq suliniutit taakkua marluk assigiissuterpassuaqarnerat – assersuutigalugu aatsitsivik sumiiffimmi inoqarpallaanngitsumi killilimmillu isumalluutilimmi sanaartorneqarsimavoq, kiisalu aatsitsivik Maniitsup eqqaani aatsitsiviliassatut pilersaarutigineqartumut assingussasoq ilimagineqarluni.

- Taamaattumik Islandimi ilisimatusaatiginninnermit misilittakkat Kalaallit Nunaanni suliniummut ilisimasanik iluaqutaasunik pissarsissutaasinnaapput suliniullu pillugu oqallinnermut kiisalu nassatassat pitsaasut siuarsarnissaannut pitsaanngitsullu annikillisarnissaannut tapertaasinnaallutik, Greenland Developmentimi paasissutissiisartoq Juaaka Lyberth oqarpoq.

Nalunaarusiaq Akureyri Research Centerimi ilisimatusartumit Hjalti Johannesonimi 2010 Namminersorlutik Oqartussanut suliarineqarpoq assingusumillu ilisimatusaatiginninnermik Islandip naalagaaffianit aningaasalersorneqartumik tunngaveqarluni.

Nalunaarusiaq uani atuarsinnaavat.