Poorskimi kalaallisut qallunaatullu naalagiarneq

Poorskip ulluani Jyllandip avannaani illoqarfiit pingaarnersaanni qallunaatut kalaallisullu naalagiartoqassaaq

Erinarsoqatigiit Ikinngutigiit sapaatiuppat kalaallisut poorsksiutinik tussiassapput, erinarsoqatigiillu soorunami kalaallisoorusupput. Assi: Rimdal Th. Høegh

Poorskip sapaataani Aalborgimi Hans Egedep oqaluffiani qallunaatut kalaallisullu qulinut naalagiartoqassaaq.

Qallunaatut naalagiartitsineruvoq ileqquusoq Aalborgimi kalaallit peqatigiiffiat Ikinngutigiit tassanilu erinarsoqatigiit suleqatigalugit kalaallisut aamma ingerlanneqartussaq.

Erinarsoqatigiit Ikinngutigiit kalaallisut poorsksiutinik tussiassapput, domprovstilu soraarneq Richard Petersen kalaallisut atuffassissalluni.

Aalborgimi Jyllandillu avannaani kalaallit palaseqartinneqarunnaarsimammata Richard Petersenip qanittukkut tunuarussimanera peqqutaalluni, taamatut naalagiarneq tuppallersaataalaarpoq.

Naalagiartitsissaaq palasi Annette Kassow Hans Egedes Kirkemiittoq.

Powered by Labrador CMS