Isuanut suliami innuttaasunik ataatsimiisitsinerit kinguartinneqarput
Isuani saviminermik piiaavissaq pillugu apriilimi sisamariarluni innuttaasunik ataatsimiisitsinissaq pilersaarutaasimagaluarpoq. Taakkuli kingutinneqarallarput
Naalakkersuisut siusinnerusukkut nalunaarutigisimavaat Isuani savimissamik aatsitassarsiornissaq pillugu apriili qaammat sisamariarluni innuttaasunik ataatsimiisitsisoqassasoq.
- Ajuusaarutigalugu nalunaarutigissavarput, ataatsimiinnissatut aalajangiussat kingusinnerusumut kinguartinneqartariaqartut. Tamatumunnga peqqutaavoq qinnuteqarnermi najoqqutassat London Miningimit suli tiguneqarsimanngimmata, taamaattumik tupinnanngitsumik apriilimi innuttaasunik ataatsimiisitsisinnaanngilagut. Qinnuteqaat tigusimaleriarutsigu, suleriaasissarlu pillugu paasisimasaqaleriarutta piffissanik nutaanik piaarnerpaamik nalunaarutiginnikkumaarpugu.
Innuttaasunimmi ataatsimiisitsinnginnitsinni eqquutsinneqartussamik suleriaaseqartoqarpoq. Suliffeqarfiup piiaanissamut akuersissut pillugu qinnuteqaat eqquutsereerpagu DCE (qanga Danmarks Miljøundersøgelser), Pinngortitaleriffik oqartussallu inatsisini piumasaqaatit eqquutsinneqarsimasut qulakkeertussaavaat. Taamaalereerpat qinnuteqaat oqartussanut tunniunneqarsimasutut akuerineqassaaq. Tamatuma kingorna nalunaarusiat tamanut saqqummiunneqartussapput, pilersaarullu pillugu apeqqutit innuttaasunik ataatsimiisitsinnginnerni ammasumik oqallinnissamut isorinnittumillu apeqqusiinissamut tunngavissaqalissammat.
- Innuttaasut soqutiginnittullu allat najoqqutassanik misissuinissamut periarfissinniarlugit qinnuteqaatip tusarniaassutigereernerata kingoq sapaatit akunneri sisamat missaat qaangiutereerpata innuttaasunik ataatsimiisitsinissat aatsaat pisinnaalissapput, Ove Karl Berthelsen oqarpoq.
Innuttaasut paasissutissinniarpai peqataatillugillu
Oqaatigaa innuttaasut ilisimatittuarnissaat peqataatinnissaallu ataatsimiinnerit siunertaraat, taamaalilluni pilersaarummut isummat aalajangiiniarnermi aamma ilanngunneqartussaammata..
- Innuttaasut tungaanni isumakuluuteqartoqassappat siunnersuuteqartoqassappallu qinnuteqaammik suliarinninnermi Naalakkersuisunit eqqaamaneqassapput, Ove Karl Berthelsen oqarpoq.
- Innuttaasunik ataatsimiisitsinerni tamani imaqarniliortoqartassaaq, innuttaasunillu apeqqutit akissutillu allattorneqassapput kingornalu Naalakkersuisunut tunniunneqarlutik tamanullu saqqummiunneqassallutik.
- Ataatsimiinnerit ingerlanneqassapput ataatsimiinnermi aqutsisoq arlaannut attuumassuteqanngitsoq aqutsisoralugu, taamaalilluni paasissutissanik ilisimasat siammertinnissaat innuttaasullu peqataatinneqarneri arlaannut attumassuteqannginnissaat qulakkeerneqassalluni. Innuttaasunik ataatsimiisitsinissat sisamat makkuninnga qulequtaqartussat pilersaarutigineqarput:
1. ISUA-ni pilersaarut pillugu nalinginnaasumik paasisitsiniaaneq peqataassallutik Namminersorlutik Oqartussat aamma London Mining.
2. ISUA-ni pilersaarummi avatangiisitsigut eqqarsaatigisassat, peqataassallutik Pinngortitaleriffi aamma Danmarkimi Det Nationale Center for Miljø og Energi, DCE.
3. ISUA-ni pilersaarummi inuiaqatigiinnut iluaqutissat, peqataassallutik Namminersorlutik Oqartussat.
4. Inaarutaasumik innuttaasunik ataatsimiisitsineq peqataassallutik Namminersorlutik Oqartussat aamma London Mining.
Ataatsimiinnerni Inuussutissarsiornermut Aatsitassanullu Naalakkersuisoq Ove Karl Berthelsen suliffeqarfiit arlaannut attuumassuteqanngitsut, soorlu Pinngortitaleriffik aamma DEC, Det Nationale Center for Miljø og Energi kissalu suliffeqarfissuaq London Mining peqataassapput.
Inaarutaasumik innuttaasunik ataatsimiisitsinermi ataatsimiinneq sioqqullugu innutaasut pilersaarut pillugu apeqqutit itisilikkat nassiunnissaannut periarfissinneqassaput. Tassani Naalakkersuisunut ilaasortaq, Namminersorlutik Oqartussat aamma suliffeqarfissuaq London Mining innuttaasunut akissuteqassallutik piareersimassapput