Ini: Aasianni inissiat pitsaanngillat
Aasianni inissiani isorineqaqisuni ajoqutinik teknikerit nassaartorput. Inissianik nutarterisoqassanersoq Ini-mit maajimi aalajangiivigineqassaaq
Aasianni illoqarfiup immikkoortortaasa ilaanni Inip attartortittagai 53-it qaammatini tulleriiginnarni arlalinngortuni kiammik imermillu kissartumik amigaateqarput.
Aasianni Nalunnguarfik 26-104-mi aamma Aqqulluk 22-46-mi inissiat inissiaatileqatigiiffimmit Inimit teknikerinut takuniartinneqarsimalerput.
- Teknikerit misissuereerlutik inerniliipput, sanaartukkat pitsaanngeqisut, sanaartukkat ussiitsorujussuummata. Taamaattumik issilerlunilu anorleraangat inissiat suertorujussuusarput. Assersuutigalugu inissiat ilaanni qilaap ataani kiassuseq 30 grader uuttorneqarpoq, natilli nalaanni 18 gradiulluni, Ini paasissutissiivoq.
Læs "- Siumut bør undskylde for boligforhold"
Læs "Siumut raser over boligforhold"
- Taamatuttaaq paasineqarpoq inissiaqarfinni ungasianit kiassarnermut aqqusersuutit 2009-mi taarsersorneqarnerat pitsaanerpaamik ingerlanneqarsimanngitsoq, kiassaatimmi kiassaasinnaanerat annikilleriarsimavoq. Taamaalilluni kiassaatini kissamik iluarseeriarnissaq aamma ajornakusuulersarpoq, pingaartumik sanaartukkat ussitsuunerat eqqarsaatigalugu.
- Kissamik pilersuinerup teknikkikkut misissorneqarneranut atatillugu maannakkorluinnaq iluaqusersuutissanik siunnersuuteqartoqarpoq, kiassaatit iluarsiivigineqarsinnaaqqullugit tamaanilu inissianut tamakkiisumik kiassaasinnaaleqqullugit. Taamatuttaaq pitsanngorsaataasinnaasunik annikitsunik siunnersuuteqartoqarpoq. Pitsanngorsaanerit taakku sapinngisamik piaarnerpaamik suliarineqassapput. Taamatuttaa kissamik pilersuinerup annertuumik allanngortiterneqarnissaanut aasaru ingerlanneqarsinnaasussamik siunnersuuteqartoqarpoq, inissiaatileqatigiiffik nalunaarpoq.
Maajimi aalajangiisoqassasoq
Ini-mi sanaartukkanut teknikkikkut pisortaq, Jesper Johannesen, napertorlugu, inissiat siunissami qanoq pinissaat ungasinngitsukkut paasinarsissaaq:
- 2009-mi aqqusersuutinik iluarsaassisoqarpoq, tamannali aaqqiissutissat pitsaanersarisimanngilaat. Tamannalu sanaartukkat qanoq ussiitsiginerannut sanilliukkaanni tamanna pitsaavallanngitsumik ataatsimoortitsineruvoq. Inip ajornartorsiutip qanoq annertutiginera maluginiarsimalerpaa apriilillu ingerlanerani Nalunnguarfik 26-104-mi aamma Aqqulluk 22-26-mi sanaartukkat qanoq issusaannik nalunaarusiamik sukumiisorujussuarmik suliaqassalluni.
- Taamaalilluni maajimi aalajangerneqarsinnaalissaaq sanaartukkat nutarterneqassanersut, Jesper Johannesen nassuiaavoq.