Palmit sapaataat oqaatsinut inatsimmit atorunnaarsinneqartoq
Inatsisissatut siunnersuut ilagiinnit naasuernianillu sakkortuumik akerlilerneqarpoq
Palmit sapaataat ullumi nalliussisarput qularnanngitsumik Kalaallit Nunaanni qaammatisiutini Palmit sapaataattut allassimasut kingullersarissavaat.
Kultureqarnermut Ilageeqarnermullu naalakkersuisoq Mimi Karlsen, Inuit Ataqatigiit, upernaakkut ataatsimiinnermi oqaatsinut inatsissatut siunnersuumik nutaamik tamaginni attaveqatigiinnermut piumasaqaatinik sukaterisussamik saqqummiussissaaq. Oqaatsinut inatsit namminersorneq pillugu inatsimmut ilassutaasussaavoq, namminersorneq pillugu inatsimmi paragraf 20-mi allassimammat: Kalaallisut oqaatsit Kalaallit Nunaanni pisortatigoortumik oqaasiupput.
Oqaatsinut inatsisissap niuernermik ingerlatalinnut nassataanik pisiniarfinni allagartalersuineq Nuuk Ugeavisimilu ussassaarutit kalaallisut allassimasalissapput, sukaterinerullu suliffeqarfinnut oqartussanullu nassataanik sullitanut innuttaasunullu allakkat akileeqqusissutillu kalaallisut allassimasalissallutik - taamaanngippallu akiligassiisoqartalissalluni.
Oqaatsinut inatsisissami sukaterinerpassuit siunertarineqanngitsumik nassatarisaasa ilagigunagaattut Palmit sapaataat oqaatsinik nakkutilliisunit aamma isiginiarneqassaaq. Inatsisissatut siunnersuummi takuneqarsinnaavoq Palmit sapaataat 2013-imiit atorunnaassasoq. Inatsisissamut oqaaseqatini nassuiaatineqarpoq palmi naasulerinikkut oqaatsitigulluunniit naasuunngitsoq Kalaallit Nunaanni naatsiivinni naasartoq, taamaattumillu orpik oqaatsinut inatsisissamit uppisinneqassaaq. Palmeqanngippat aamma Palmit sapaateqassanngilaq.
Tusarniaanermi akissutit isorinnittut
Inatsisissatut siunnersuut attuumassutilinnut tusarniaassutigineqarsimavoq, Sermitsiaq.AG-lu tusarniaanermi akissutinik takunnissinnaatitaanermik qinnuteqarnermini akuerineqarpoq.
Kalaallit Nunaanni ilagiit nalliuttup atorunnaarsinnissaanut sakkortuumik akerliliissuteqarput Matiusip iivanngkiiliuani kapitali 21 Makkorsillu iivanngkiiliuani kapitali 11 innersuussutigalugit:
– Palmit sapaataat Jiisusip siutituumut qimusserluni Jerusalemimut iseriartornera inuppassuillu palmit avalequtaannik aqqusinermut siaartiterinerat malillugit atserneqarsimavoq. Palmit sapaataat atorunnaarpat poorskeerutissaaq Jiisusip toquneranik makinneranillu, kristumiutut upperisatta tunngavigisaannik, imaqartumik.
Inatsisip nassatassai Nuummi naasuernianit arlalinnit ernummatigineqarput, naak palmit palmillu avalequtaat tunisartakkatik ikittuinnaagaluartut: – Taavami suna tullinnguutissava? Påskeliljenik, fresianik hyacintinillu kalaallisut sorlaqannginnerat aamma pissutigalugu tuniniaaqqusaajunnaarnerput!
Sulinermik inuussutissarsiuteqartut kattuffiata SIK-p oqaatsinut inatsisissaq pillugu tusarniaanermi akissutimini atorunnaarsitsineq isummerfiginngilaa: – Tassami oqaatsinut inatsit nutaaq atuutileraluartoq Palmit sapaataat suli sapaammi pisassaaq, taamaalillutillu ilaasortavut ullormi tassani sapaatini nalliuttunilu sulinerminni akissarsiaqartitaanissaminnik qularnaarunneqassallutik.
Naalakkersuisooqatigiit neeqquluttut
Oqaatsinut inatsissatut siunnersuut nutaaq naalakkersuisooqatigiinnik kingumut neeqqulutsitsivoq.
Demokraatit politikkikkut oqaaseqartartuat Anda Uldum allaaserisami Sermitsiaq.Ag-mit februaarip 22-ani ilanngunneqartumi allappoq: – Oqaatsinut inatsisissami allannguutit ilaat ajunngilluinnarput, allalli pitsaanngilluinnartuullutik.
Naalakkersuisuat Kuupik Kleist, Inuit Ataqatigiit, qanittukkut tusagassiortunik katersortitsinermini upernaakkut ataatsimiinnermi inatsisissatut siunnersuutinik saqqummiussigami oqaatsinut inatsisissamik isornartorsiuinermik annikillisaaniaraluarpoq.
– Juunip 21-ani 2009-mi namminersulernittat pisussaaffilerpaatigut oqaatsinut inatsisip namminersornermut inatsimmut naapertuuttunngorsarnissaanik, kalaallisut oqaatsit assortorneqarsinnaanngitsumik Kalaallit Nunaanni pisortatigoortumik oqaasiummata, Kuupik Kleist sukaterinernut tunuliaqutaasut pillugit oqarpoq.
– Pitsaanerusumik akikinnerusumillu ingerlatsisoqarsinnaappat inatsisissatut siunnersuummi sukaterinernut isornartorsiuinerit tusarnaarnissaannut piareersimavunga, kisianni nammineq nunagisami nammineq oqaatsit atorlugit kiffartuunneqarnissamik piumasaqaatip naqisimaneqanngitsumik oqaaseqarsinnaatitaanermut innarliinera imaluunniit inuit pisinnaatitaaffiinik Inatsisinillu Tunngaviusunik unioqqutitsinerunera takujuminaatsippara.
– Sooq oqaatsinut inatsit allanngortissaneripput assortuussutiginagu qanoq ililluta oqaatsinut inatsit allanngortissaneripput oqaloqatigiissutiginiartigu, Kuupik Kleist noqqaavoq.
Mimi Karlsenip oqaatsinut inatsisissaq upernaakkut ataatsimiinnermi sisamanngornermi maajip qulingani siullermiigassanngortissavaa, aappassaaneerneqarnera pingajussaaneerneqarneralu - taamalu aamma inaarutaasumik akuersissutigineqarnera aatsaat ukiakkut ataatsimiinnermi pissasut. Tamatumalu pinissaata tungaanut ullumi apriilip aallaqqaataani Palmit sapaataat kingulleq nuannaarutigisinnaavarput.