Atornerluineq pillugu paasisitsiniaaneq annertusarniaraa

Anaananngortussat ikiaroornartumik pujortartarnertik ilaginnaannartarpaat. Maanna atornerluinermut tunngasuni siunnerfeqartumik immikkut ittumik suliniuteqartoqartariaqalersoq, Agathe Fontaine isumaqarpoq

Anaanaq naartunermini ikiaroornartutortartoq naartuminik ajoqusiisarpoq. Assit: Polfoto/Nørgaard Sørensen

Naalungiarsuit qaammatit kingulliit sisamat ingerlanerini inunngortut 15 procentii anaananit ikiaroornartumik atuisunit qitornartaarineqaraluartut 15 procentit taakku kisitsisitigut paasissutissani atorneqarsinnaanngillat. Amerlassusaalli ernumalersitsipput.

- Taamaattumik ikiaroornartumik imigassamillu atornerluineq suli siunnerfeqartumik isiginiarneqassapput. Tamanna pissaaq innuttaasut peqqissuunissaannik suliniummi Inuuneritta 2013 - 2018-imi immikkut sammisatut, peqqissutsimut naalakkersuisoq Agathe Fontaine Atassummeersunut Sivert K. Heilmannimut Knud Kristiansenimullu akissutimini allappoq. Taakku peqatigiillutik atornerluinermut tunngasuni tassungalu ilanngullugu naartusunut suliniuteqarneq pillugu paragraf 37 naapertorlugu apeqquteqaatiminni Agathe Fontaine akissuteqaqquaat.

Ernisussiortumi misissortinnermi siullermi naartunermi sapaatip-akunnerisa aqqaneq-aappassaanni pisartumi naartusut tamarmik aanngaajaarniutinik atuinerannut tunngasumik apersuisarneq nalinginnaasumik suleriaasiuvoq. Naartusoq ikiaroornartumik pujortartarpat journalimi tamanna allanneqartarpoq, ikiaroornartullu ajoqutaasumik sunniutigisartagai pillugit naartusoq ernisussiortumit ilitsersorneqartarluni.

Ernisussiortumi misissortinnerni tulliuttuni tamani qanoq ingerlasoqarnera malittarineqartarpoq. Ilaatigut naartusut tamarmik atornerluinerminnut katsorsartinnissamik neqeroorfigineqartarput.

Sivert K. Heilmann aamma Knud Kristiansen isumaqarput anaanat naartuminnik ikiaroornartumik inerteqqutaasumik aserorsaataasumillu sunniiviginnittarnerat nipangiullugu akuersaaginnarneqarsinnaanngitsoq.

Powered by Labrador CMS