Nunap inuii silap pissusaata allanngorneranit eqqugaapput
Silap pissusaata allanngornerata nunap inuiini kingunipilui Naalagaaffiit Peqatigiinnit sammineqalerput. ICC-meersoq Aqqaluk Lynge nalunaarusiussaaq
- Pilersaarusiorneq piorsarsimassutsitsinnut ilaanngilaq. Ullaakkut takkutiinnassaatit ullormut suliassatit suliaralugit Marilyn Wallace, Australiami Queenslandip avannarpasissuani Kuku Nyungkameersoq, oqarpoq, silap pissusaata allanngornera nunallu inuiinut kingunipilui pillugit FN-imi ataatsimiinneq ataasinngornermi ammarneqarmat.
ICC-ip siulittaasua Aqqaluk Lynge ataatsimiinnermut ullunik pingasunik sivisussuseqartumut peqataavoq, immikkullu ilisimasallit qulingiluaasut akornanniilluni.
- Pingaartumi nunap inuii nunani kiattuneersut Manerassuarmiullu assigiinngitsutigut eqqugaapput. Immikkut ilisimasallit allat peqatigalugit aaqqiissutissanik nassaarniasaanga FN-imilu silap pissusaa pillugu ataatsimiittartunut nalunaarusioqataassallunga, Aqqaluk Lynge Sermitsiaq.AG-mut oqarpoq.
Issittumeersuunngitsut
- Suliaq pingaaruteqarpoq. Ataatsimiinnermi inuiaat issittumeersuunngitsut sammigaluarivut nunap inuiinik nunarsuup sinneraneersunik sullissinissaq ICC-mut aamma pingaartuuvoq, Aqqaluk Lynge erseqqissaavoq.
Nunarsuaq tamakkerlugu kulstofimik aniatitsineq ukiumiit ukiumut qaffakkiartortuarpoq. Nunarsuarmi kiatsikkiartorneq 2 grader celsiusimit appasinnerutinneqassappat aniatitat ukiuni tulliuttuni tallimani qaffasinnerpaaffissaminniilertariaqarput appariartulertariaqarlutillu. Tamanna nunarsuaq tamakkerlugu naalagaaffinnut anguniagaavoq, qaffasinnerusumik kiatsitoqarpat pinngortitami ajunaarnersuarnik nassataqassammat, National Geographic allappoq.
Australiami Cairnsimi ataatsimiinnermut silap pissusaata allanngornerata nunap inuiinut kingunipiluinik immikkut sammisaqarfiusumut FN-universitetet aamma FN-imi silap pissusaa pillugu ataatsimiittartut, IPCC, aaqqissuisuupput.