Inuit Lis tusaarusunneruaat
Arfininngorneq Nuummi tusarnaaritsinerit pingasut toqqagassaapput - inuilli Lis Sørensen tusaarusunneruaat
DDR (Disko Democratic Republik) aamma Søren Berlevs Gas-show ilungersuapput arfininngornermi unnukkut Katuami Lis Sørensenip tusarnaartitsinissaanut unammillernissaminnut, unnummi taannarpiaq Katuaq tusarnaartitsinernik pingasunik neqerooruteqarpoq.
DDR assorsuaq appisimaarluarput nipaa qulliillu assut pitsaallutik inuilli takkuttut 30't missaannaannipput. DDR tassaasut qatanngutigiit Simon, Anda (Andreas), guitar aamma Ib Uldum, bas kiisalu tumerparpaartuat Martin Zinck, nipilersornissaminnut Ib Uldumip paarlattuatut Hans Jukku Noahsen aggersissimavaat.
Amerlanerulaalli Søren Berlevs Gas-show ornippaat, kisianni Sermitsiaq.AG'p aallartitaata, Benny Kokholm, allagai naapertorlugit; nipilersoqatigiit allaanngillat angutit utoqqaat tallimat angerlarsimaffimminni ingillutik sikaatorusaajutaa sapaammi aviisimik atuarusunnerugaluartut.
Illuatungaani Lis Sørensen Katuap paarlersuani inunnik ulikkaartumi nuannerluinnartumik qiimanaqaluni tamannguat tusarnaartitsivoq.