Ilinniartitsisut mattussinerat inatsisit atorlugit unitsinnialeqaat
Maliina Abelsen maanna periarfissarsivoq ilinniartitsisut aaqqiagiinnginnerannut akuliunnissaminut. Amerlanerussuteqartut inatsisitigut akuliuttoqarnissaanik kissaateqarput
- Inatsisitigut akuleruttoqarnissaanut naalakkersuinikkut isumaqataalluartoqarnera paasinarsivoq. Imakimik akerleriissuteqarnerup unitsinnissaanut inatsisitigut akuleruttoqarnissaa pillugu Kanukokamit kajumissaarummut naalakkersuinikkut isumaqataalluartoqarnera paasinarsivoq.
Suliaq Naalakkersuisut peqatigalugit oqaluuserissavarput, aalajangernerlu piaartumik nalunaarutigineqarumaarpoq.
Aningaasaqarnermut naalakkersuisoq Maliina Abelsen tusagassiivinnut allappoq. Taassuma siusinnersukkut oqaatigereerpaa naalakkersuisut aallaavigigaat atuartoq ataasiinnarlunniit aaqqiagiinnginneq pisuulluni atuartinneqarnissaminik annaasaqassanngitsoq. Sermitsiaq.AG'ip arfininngormi knr.gl'imi allaaserisaq issuaariffigalugu allareerpoq Tasiilami atuartut atuartinneqanngitsoortalersut ilinniartitsisunik atorfinitsitsinissamut mattussisimaneq pissutigalugu.
Ilinniartitsisut aaqqiagiinnginnerat aallaaveqarpoq 2010mili sulinermut isumaqatigiissutit pitsanngornissaannik anguniagaqarneq, taamanili ilinniartitsisut kissaataat tamarmik tunuartinneqarput. Mattussinerup nassataraa aaqqiagiinnginnerup ingerlanerani ilinniartitsisunik atorfinitsitseqqusaannginneq marsip aallaqqaataani atuutilersoq. Pisortat isumaqatigiinniartartui aamma ilinniartitsisut kattuffiata isumaqatigiinniaraluarneri marsip 27'anni isasoorput.