Nunatsinni nuna sajuttoq
Tallimanngornermi ullaakkut Grønlandshavimi immap naqqa nikitsiarpoq. Earthquake nunap sajunnera uuttortarpaa richterskalami 4,9 sakkortussuseqartutut
Nunap naqqa eqqornerusumik immap naqqa Grønlandshavimi tallimanngorneq ullaakkut kitaani nalunaaqqutaq 09.19 sajuppoq. Nittartakkap USGS Earthquake taamanna takutippaa.
Nunap sarngisa imminnut attuuttarnerat ilaanni pisarpoq, kingullermilli 2009'mi tamaani immap naqqa sajuttoq uuttortarneqarpoq. Immap naqqata sajunnera eqqornerusumik isorartussutsimi 79.942°N, 0.985°E - pivoq 9,9 kilometerisut itissusilimmi, Kalaallit Nunaata avannaanit 386 kilometerisut ungasissusilimmi, Norgemi Tromsømit 776 kilometer aamma Nunavummit 1055 kilometer.
Immap naqqata sajunnerani kialluunniit kaffisorfia nikeriarsimanavianngikkaluarpoq.
Danmarkimiittoq DanSeis, Ministeriet for Forskning, Innovation og Videregående Uddannelserimit 25 million koruuninik aningaasaliiffigineqarpoq, Avannaani nunat sarngisa misissuiffigineqarnissaanut atugassanik.
Uuttortaanerit Avannaata imartaata naqqanut nunamik sajupillatsitsissutit atorlugit ingerlanneqassapput. Savalimmiut, Island aamma nunatta sananeqaataat misissugassanut ilaapput.
- Periutsit nutaat atortullu nutaat atorlugit siornatigumut naleqqiullugu Nunarsuup "iluanut" suli appakaannerusinnaalerpugut uuttortaallutalu. Maannakkut 500 aamma 1000 kilometerinik ilorpartersinnaalerpugut. Periutsit ilaatigut uuliasiortunit atorneqartartut paasissutissanik 6 - 10 kilometeri tikiinnarlugu pissarsiviusinnaapput, professor Hans Thybo, Københavns Universitet ku.dk'mut oqarpoq.