Buus Pedersen GA'mi pisortanngorpoq

Tele Greenlandip pisortaanerisimasaa Brian Buus Pedersen, Kalaallit Nunaanni Sulisitsisut Kattuffianni - GA'mi - pisortanngorpoq, Henrik Leth, Polar Seafoodimi siulersuisut siulittaasuattut atorfinissalluni soraartoq.

Apriilip aallaqqaataani tamanna pissaaq.

- Siunnersorti GA'llu siulersuisuini siulittaasoq Henrik Sørensen aamma marsip 24'at tikillugu siulittaasup tullia Mogens Ø. Larsen suleqatigiilutik GA'mi pisortaanermik atorfinitsitsinissami suut pisariaqarnersut suliaqaraat. Kissaatit tamakku tunngavigalugit Brian Buus Pedersen atorfimmut naleqquttutut innersuunneqarpoq, siulersuisuunernit akuerineqartoq. Brian Buus Pedersen apriilip aallaqqaataani atorfinissaaq GA ilisimatitsivoq, Henrik Leth suliaminit paarlakkiartuaarneqassasoq.

- Uagutsinnut pisortamik nutaamik atorfinitsitsinissatsinni pingaaruteqarpoq, pisortatut tunuliaqutaqarneq, inuussutissarsiornermik ilisimasaqarluarnissaq soorlu Kalaallit Nunaanni pissutsinik ilisimasaqarluarnissaq piumasaqaataasoq, GA'mi siulersuisut siulittaasuat Henrik Sørensen aamma marsip 24'at tikillugu siulittaasup tullia Mogens Ø. Larsen.

- Ukiorpassuarni pisortat ingerlataanni kingornalu pisortat suliffeqarfiutaanni angisuumi pisortaaniusimanini pissutigalugit Kalaallit Nunaanni politikkikkut inuussutissarsiornikkullu pissutsit nalunngilluarpai. Tamakkua saniatigut inuiaqatigiinni suliassaqarfinnik arlalinnik aallussisuunera GA'mut aamma pingaaruteqarput.

Suliassaq pissanganartoq
GA'mut pisortanngortoq, Brian Buus Pedersen nammineq oqarpoq:

- Ukiuni qaangiuttuni GA erseqqippoq inuiaqatigiinni oqallinnermi sakkortuumik isummertarluni kattuffiup ineriartorteqqinnissaa qilanaaraara.

- Pingaartumik inuussutissarsiornikkut periarfissat nutaat aatsitassarsiornerup iluani puttukkiartortut eqqarsaatigalugit, GA'mut unammillernassaaq sulisut inuiaqatigiinnilu suleqatigiit akornanni naapeqatigiissaarisartutut inissisimaniarnissaq - taamattaaq nunarsuup sinnerani attaveqarfitsinnut ameliartuinnartunut.

- Isertuutissanngilara Henriup paarlatsissaatut toqqarneqarnera tulluussimaarutigigakku, suliassaq maniguullunga anguniagaqarlungali ingerlatissavara, qilanaarpunga, Brian Buus Pedersen oqarpoq.

Brian Buus Pedersen, 52'nik ukioqarpoq , Aarhus Universitetimit cand. scient. pol.soraarummeersimalluni aamma MBA'mik (Master of Business Administration) University of Ottawa, Canadami 2001 soraarummeersimavoq. Kalaallit Nunaannut 1989, nuuppoq Aningaasaqarnermut pisortaqarfimmi pilersaarusiornermik immikkoortami atorfeqalerluni, ilaatigut aamma Namminersornerullutik Oqartussat Allattoqarfianni aningaasaqarnermik aqutsivimmi allaffimmi pisortaasimavoq.

1995 Tele Greenland A/S atorfinippoq, 2004'mit 2011'mut pisortaanertut atorfeqarluni.