Kanukokap ilinniartitsisut aaqqiagiinngissutaanerat taamaateqquaa
Kommunit Naalakkersuisunut isumaliutigeqquaat meeqqat atuarfianni atuartitsinerup ingerlaannarnissaa qanoq qulakkeerneqarsinnaanersoq
- Kommunit sisamaasut ataatsimoorlutik Naalakkersuisunut saaffiginnissuteqarlutik ilinniartitsisut kattuffiannik IMAK-imik isumaqatiginninniarnerit ajalusooqqanerat assut isumakulunnartoqartillugu nalunaarput.
Martha Abelsen, Kanukokap siulittaasua nalunaarpoq.
Pissutsit taamaannerat kommunit toqqissisimanartuutinngilaat atuarfimmik atuisut eqqarsaatigalugit, tassa atuartut angajoqqaallu, aammalumi ilinniartitsisut atuarfimmilu sulisut allat, minnerunngitsumillu kommunalbestyrelsit atuarfiit ingerlanneqarnerinut aningaasaqarnerinullu akisussaasut eqqarsaatigalugit.
- Kommunit pisariaqarluinnartuutippaat aaqqiisoqassasoq atuartitsineq inatsisitigut pisussaaffigineqartoq ingerlanneqaannarsinnaaqqullugu aammalu atuartitsinerup ukiumut atuarfiusumut tulliuttumut siunissamullu pilersaarusiorneqarnissaanut tunngavissaqaqqullugu. Saaffiginnissummilu ippassaq Naalakkersuisunut nassiunneqartumi kommunit oqaatigaat meeqqat atuarfiata ataavartumik ingerlanneqarnissaa inuiaqatigiit susassaqarfigigaat pingaaruteqarluinnartoq, sulisut sulisitsisullu isumaqatigiinngissuteqarneratigut navianartorsiortinneqarnaniluunnit unittoortinneqarsinnaasariaqanngitsoq, Martha Abelsen nassuiaavoq.
- Piffissat suliffiusut il.il. pillugit isumaqatigiinniarnikkut aaqqiisoqarsinnaanngippat, taava Naalakkersuisut isumaliutigisariaqarpaat inuiaqatigiinni politikkikkut atituumik tunuliaqutaqarluni allatigut qanoq iliuuseqartoqarsinnaanersoq atuartitsineq pilersaarusiornerlu toqqissisimanartumik ataavartumillu ingerlanneqarsinnaaqqullugit, kommunit Naalakkersuisunut allakkaminni taama oqaaseqarput.