Sulisunik peersitsineq tupaallannartoq
Apeqquterpassuit akissutissaqanngitsut. Sanami pisortat pingasut angerlartitaanerat napparsimaveqarfimmi toqqissisimaginngilaat
Dronning Ingridip Napparsimavissuani perulluliorneq sulisut akornanni toqqissisisimassutaanngilaq.
- Soorunami ilaasortagut ernumapput, Peqqissaasut Kattuffianni siulittaasoq, Inuuti Fleischer oqarpoq.
- Sulinermut atugassarititaasunut qanoq sunniuteqarpa?
- Soorunami ilaasortatsinni pisoq aalassassutaavoq, Inuuti Fleischer oqaaseqarumarpianngitsoq akivoq.
- Apeqqut tassaavoq sooq pisortaanerit pingasut sulinerminnit peersitaanersut. Ilissi nalunngilisiuk sooq taama pisoqarnersoq?
- Tusagassiivinnit tusakkatsinnit allaanerunngitsut kisiisa nalunngilagut. Maannakkorpiaq kikkut tamarmik eqqoriaasaqattaarput. Misissuinerup aallartinneqareersup inernissaa utaqqisariaqarparput.
- Pisoq pillugu siumut kalerreqqaarneqarpisi?
- Naagga, siumut ilisimatinneqanngilagut.
Peqqissaasut Kattuffiannit oqaatigineqarpoq piffissami qaninnermi tusagassiivinnut nalunaaruteqassallutik, pisortaanerit pingasut sulinerminnit peersitaanerat tupaallannartoq erseqqissaavigissallugu.
Peqqinnissaqarfimmi aqutsinermik pisortaaneq Kurt Nielsen, nakorsaaneq Carsten Thordal aamma peqqissaasut pisortaanerat Lisbeth Lumby Rasmussen, sapaammi suliffimminnit tunuartitaapput. Nunatsinni peqqinnissaqarfimmi pisortaanernit sisamanit pingasut "aningaasarsiat eqqumiiginarsinnaasut" pillugit suliaminnik ingerlatseqqusaajunnaarput.
Peqqissutsimut pisortaqarfimmi pisortaaneq Ann Birkekær Kjeldsen, Sermitsiaq.AG'mut ilisimatitsivoq.