Qilalukkat siuaasarisimasaat ilisimatuunit naneqartoq
Niaqoq ujaranngornikoq ukiorpassuarni toqqortaalluni puijugaq nutaamik misissuiffigineqalerpoq. Paasinarsimmammi arferit ilisimaneqanngitsut ilagigaat
Arferup kigutillip suli suuneranik ilisimaneqanngitsup niaqua USA'mi uumasunik katersugaasiviit ilaanni ujaranngornikut akornanniittoq qaqinneqaqqippoq.
Niaqoq 3-4 millioninik pisoqaassusilik maannamut uumasut qilalukkat qilalukkallu qaqortat siuaasarisimagunagaat Nordpolimut qanittumi uumasuusimavoq. Arferit ilaat taanna taaguuserneqarpoq "Bohaskaia monodontoides".
- Maannamut qilalukkat qaqortat niaqui kisiisa ilisimavarput taanna aserualasimasoq. Maannakkut nassaarput ilivitsuunerummat takusinnaavarput qilalukkamit qaqortamit pinngorfeqanngitsoq, paasisamik nutaamik saqqummiussisoq Nicholas Pyenson, Smithsonian’s National Museum of Natural History USA, kuratoriusoq tusagassiivinnut nalunaarpoq.
Niaqoq aatsitassarsiorfimmi nassaarineqartoq
Niaqoq 1969'imili nassaarineqarpoq, aatsitassarsiorfimmi illoqarfimmut Hamptonimut amerikap avannaani naalagaaffimmi Virginiamut qanittumi. Tassunga pisimavoq nunaq taamani immap ataanniimmat piffissami pliocæn ukiut millionit tallimat matuma siorna.
Niaqoq palæontologiskenit katersanut Smithsonian Nationale Museum of Natural History, Washington DC ingerlanneqarpoq. Ilisimatusartut erngerlutik qilalukkat qaqortatut taavaat. Peqqissaaruppallaarnagu toqqorneqarpoq puigorneqarlunilu 2010 tikillugu.
Katersugaasivissuarmi ilisimatuut ilaasa Jorge Velez-Juarbe aamma Nicholas Pyensonip nassaarigamikku qaqeqqippaat. Peqqissaaqqissaarlutik qilalukkat aamma qilalukkat qaqortat saarnginut katersugaasivimmi miluumasunut immikkoortortami katersanut assersuutilerlugu.
Niaqua umerlualu immikkoorilluinnarput
Paasiniaaqqissaarup paasinarsisippaa niaqumi kiinaq umerlullu qilalukkanit qilalukkanillu qaqortanit allaaneroqisoq.
Taamanna tunngavigalugu arfeq nutaatut nalilerneqarpoq miluumasullu ilaqutariikkat allattugaataanut uumasutut nutaatut nalilerneqarluni.
Paasisaq nutaaq Journal of Vertebrate Paleontology ilanngunneqarpoq.
Sermitsiaq.AG videnskab.dk, isumaqatigiissuteqarpoq taamaattumik una allaaserisaq ilanngussinnaavarput.
Paasissutissat: Nordpolimi arferit immami kissartumi uumasuupput
Qilalukkat qilalukkallu qaqortat ullumitut immami nillertumiittuaannarnikuunngillat.
Arfermit qangarsuaq uumasuusimasumik "Bohaskaia monodontoides" tupaallaataasumik paasisaqarneq ilimanarsisippaa, issittumi arferit immami nillertumiinnissaminnut naleqquttuaannarsimanngitsut. Ukiut 3-4 millionit matuma siorna tamassuma imartaa kissarnerusimavoq.
- Qilalukkat qilalukkallu qaqortat maannamut ilisimasagut Issittumi issittullu eqqaani kisimik uumasinnaapput. "Monodontides" saarngi immani kissarnerni allaallumi kissarluartuni uumasuusimapput, Nicholas Pyenson, Smithsonian's National Museum of Natural History, USA oqarpoq.
Ilisimatuut eqqoriarpaat imarpissuit sarfaasa allanngornerisa kingorna arferit nerisaat sumiiffinnut nutaanut nussorsimasut. Qilalukkallu siuaasaat avannamut nikissimasut tamaani nerisassaqarnerunertik pissutigalugu.