Umiaq 40'nik ukioqalersoq
Kalaallit Fynimi peqatigiiffiat Umiaq Danmarkimi kalaallit peqatigiiffiisa sivisunerpaamik atanikut ilagaat
Peqatigiiffik Umiaq maajimi 40'nik ukioqalerluni nalliuttorsiussaaq.
Umiaq maajip 30'anni 1972 pilersinneqarpoq amerlanernit erinarsoqatigiittut ilisimaneqarluni ukiorpaat ingerlaneranni pisuni assigiinngitsuni erinarsoqatigiittut aliikkusersuineq isumagisarsimallugu. Erinarsoqatigiit ukioq manna nipilersornikkut erinarsornikkullu unammisitsineq Tusa Vejlemi maajip tallimaanni ingerlanneqartussaq aammaarluni peqataaffigissavaa, qaammatini tulliuttuni nipilersornermik ilinniartumik erinarsoqatigiinnut attuumassuteqartumit sungiusarneqassapput.
Umiaq peqatigiiffiuvoq eqeersimaartoq. Erinarsoqatigiinnik ingerlatsinerup saniatigut peqatigiiffiup naalagiaqatigiinnerit, nereqatigiinnerit, angalaaqatigiinnerit aviisinnguarlu saqqummersittakkatik aallutaraat. Peqatigiiffik 68'inik ilaasortaqarpoq.
Umiaq ungasinngitsumi ataatsimeersuarpoq. Siulittaasutut nutaatut ivertinneqarpoq Rasmus Bjørgmose. Taassuma saniatigut siulersuisut makkunannga inuttaqarput siulittaasup tulliaa Medea R. Hansen, aningaaserisoq Stine Olsen aamma Ane-Lucia Sigurdsen, Margretha Damkilde, Grethe Marie Jørgensen kiisalu Augusta Larsen.
Rasmus Bjørgmose, Sermitsiaq.AGimut oqaluttuarpoq 40'nngortorsiorluni nalliuttorsiornissamut nereqatigiinneq aaqqissuunneqassasoq.