Peqqinnissaqarfimmi soraarsitsinerit tupannartut
Sapaatiummat uakillut tallimanut peqqinnissaqarfimmi aqutsisuni sisamaasunit pingasut suliffimminnit soraarsinneqarput "eqqumiitsumik akissarsititsisimaneq" peqqutigalugu
Peqqinnissaqarfimmi pisortaq Kurt Nielsen, nakorsat naalagaat Carsten Thordal peqqissaasullu pisortaat Lisbeth Lumby Rasmussen sapaatiummat ualikkut tallimanut suliffimminnit soraarsinneqarpoq. Taamaallaat kugutilerisut pisortaat Frank Senderovitz peqqinnissaqarfimmi aqutsisuni soraarsitaanngilaq.
Taama uppernarsaavoq naalakkersuisoqarfimmi pisortaq Ann Birkekær Kjeldsen Sermitsiaq.AG-mut.
- Sooruna peqqinnissaqarfimmi pisortaq Kurt Nielsen, nakorsat naalagaat Carsten Thordal peqqissaasullu pisortaat Lisbeth Lumby Rasmussen ippassaaq tallimanut soraarsinneqartut?
- Imaakkami pisut ilaat isummerfigisariaqarlutilu. Tamannalu ippassaq tallimanut pivoq.
- Kukkunersiuisut tikkuarpaat akissarsititsinerit ilaat eqqumiitsuusut. Tamakkulu maannakkut misissuleruttorpavut. Pineqanngillat namminerminnut akissarsitinnerat. Nalunaarusiaq naammassitinnagu allamnik oqaasissaqanngilanga, Ann Birkekær Kjeldsen nassuiaavoq.
- Maannakkut qanoq pisoqassava?
- Aqutsisoqatigiit soraarsinneqartillugit soorunami aqutsisut nutaat atuutilersussaapput, tamannalu inissittariaqarparput. Tassaapput Henrik Overvad, Peqqinnissamut pitsaaliuinermullu immikkoortortami ingerlatsinermu pisortaq, Ella Skifte, peqqinnissamut pitsaaliuinermullu immikkoortortamoi pisortaq kiisalu nakorsaqarnikkut siunnersorti Kent Kleinschmidt. Suliap suliarinerani taakku aqutsisuugallassapput.
- Qaqugu susoqassava?
- Sukkasuumik sulinissaq tamanut ajunnginnerpaavoq.
- Sapaatip akunneri qaammatilluunniit pineqarpat?
- Neruppunga qaammataasanngitsut. Immaqa sapaatip akunnera. Maannamut paasisavut naammanngillat, susoqarnissaanik aalajangiinissamut. Taamaattumik inuit suliunnaartinneqartarput misissuinerit paasiniaanerillu ingerlanneranni. MIsissuinerit naammassitinnagit qanorpiaq pisoqarsimanersoq paasiuminaappoq, Ann Birkekær Kjeldsen oqarpoq.