D: aningaasaateqarfik taamaammat
Oqallisissiami uani Andreas Uldum Demokraatit sooq aatsitassarsiornermut aningaasaateqarfik pisariaqarnersoq tunngavissiorpaa
Demokraatini eqqarsarnartutut isigaarput, Naalakkersuisut siunnersuutigimmassuk aatsitassiornermi isertitanik Kalaallit Nunaata Aatsitassarsiornermut Aningaasaateqarfianut akiliisalernissamut killigititaasup - 5 millioninit 75 millioninut qaffannissaa Naalakkersuisut anguniarmassuk.
Qaffaanerup kingunerisinnaavaa, Aatsitassarsiornermut Aningaasaateqarfiup erniortitassanik imakippallaarnissaa, Danmarkip tapiissutigisartakkani ikilisarlugit aallartippat.
Anda Uldum, Demokraatit politikkikkut oqaaseqartartuata oqallisissiami uani naliliivoq.
- Kalaallit Nunaanni Aatsitassarsiornermut Aningaateqarfeqarnerup siunertaraa siunissami atungarissaarnissamik qulakkeernissaq. Aatsitassarsiornermi isaatitat sumorsuaq ataavartussaanngillat, tassanngaanniillu isertitat aningaasaateqarfimmut ilisarnerisigut qulakkeerneqassaaq kinguaariit tulliisa aamma aatsitassarsiornermi isertitanik iluaquserneqarnissaat, Uldum allappoq.
Aatsitassarsiornermut aningaasaateqarfiup siunertaa
Kalaallit Nunaanni Aatsitassarsiornermi Aningaasaateqarfik Inatsisartunit 2008-mi akuersissutigineqarpoq.
- Kalaallit Nunaanni Aatsitassarsiornermi Aningaasaateqarfik pillugu inatsit 2008-mi ilaasortanit tamanit, allannguutissat arlallit pitsaasut akuerineqarnerannut atatillugu aningaasaateqarfiup ilusissaa annertusarneqarpoq qulakkeerneqarlunilu, politikerit aningaasanik tulleriiaarinissaminnut sapiissuseqannginnerat pissutigalugu aamma aalajangerneqarpoq aningaasaateqarfik ukiumoortumik aningaasanut inatsisini amingartoorutinut matussusiisartussatut atorneqassanngitsoq.
- Aatsitassarsiornermi Aningaasaateqarfeqarnerup siunertaraa, - aatsitassarsiornermi isertitanik ”milluaanissaq” – pinngitsoortinniarlugu pisortat killeqanngitsumik aningaasanik atuilernissaat, aningaasap nalinganik unammillersinnaanermillu innarliisumik, Anda Uldum tikkuaavoq.
- Tamatuma saniatigut eqqarsaataavoq, Aatsitassarsiorermut Aningaasaateqarfiup NamminersorlutiK Oqartussanut aningaasanik tunisisarnissaa, tapiissutit Danmarkimeersut ikiliartuaartinneqalerpata. Tamanna ersarissumik takuneqarsinnaavoq Kalaallit Nunaanni Aatsitassarsiornermut Aningaasaateqarfik pillugu Inatsisip § 7-ata imm. 2-ani.
Tamatumunnga atatillugu ajoqutaanngillunnartussaavoq Aatsitassiornermut Aningaasaateqarfiup, Namminesorlutik Oqartussanut tunniussisalinnginnermini, aningaasanik katersilluarsimanissaa erniortitsilersimassasorlu tunniunneqartartussanut tamakkiisumik ilaannakoortumilluunniit matussutaasinnaasunik.
Demokraatit tupigusuutigaat
- Tamanna tunngavigalugu Demokraatini tupigikulupparput Naalakkersuisup siunnersuutigimmagu, Kalaallit Nunaanni Aatsitassarsiornermut Aningaasaateqarfik pillugu Inatsit allanngortinneqassasoq, Aatsitassarsiornermut Aningaasaateqarfimmut aatsaat isaatitsisoqartalissasoq aatsitassarsiornermi isertitat 75 millioner koruuninik amerlanerungaangata. Massakkut isaasoqalertartussaagaluarpoq isertitat 5 millioner koruuninik amerlanerusimappata.
- Allatut oqaatigalugu Inatsimmut allannguutip kinguneranik, Namminersorlutik Oqartussat ingerlatsinermut aningaasartuutaat ukiumut 70 millioner koruuninik amerlineqarsinnaapput aatsitassarseq (neriuppugut) isaatitsiffiulerpat.
- Taamatut pingaarnersiuineq Kalaallit Nunaanni Aatsitassarsiornermut Aningaasaateqarfimmik pilersitsisoqarnialermat eqqarsaataasunut akerliulluinnarpoq. Aningaasaateqarfik ilisimaneqartutut pilersinneqarpoq ”hollandimiut nappaataat” pileqqunagu, tamanna pivoq Hollandimi piffissami sivikitsumi aatsitassarsiortoqarmat, aatsitassarsiornermi isertitanik sivikitsuinnaap ingerlanerani atuipiluttoqallarmat, Anda Uldum allappoq.