Maani internettip akia Danmark angigaat
Ingeniøren'ip nunatsinni internettimik atuinermi akit qulequtsiuppai
Danski internettimik atuisup kaffisukki neriliutigissagaluarpaa qaammatit tamaasa internettimik atuinermut akiligassat, Kalaallit Nunaanni atuisartut akiligassaasut qaffasitsigigaluarpata.
Atuagassiamik Ingeniørimik atuisut ilaata Hans Peter Dejgarsip Kalaallit Nunaanni internettimik atuinermi akit qaffasinnerusujussuat allaaseraa, inerniliullugu Kalaallit Nunaat kusanartorsuusoq akisoqisorli.
…. Kalaallit Nunaanni pinneqisumi angalaaqqaarninni tupaallaatigaara internettimik atuinerup akia Danmarkimi akiliutigisartakkanit akisunerujussuunera. Akunnittarfimmi nal. ak. ataaseq internettimut attaveqarneq 100 koruunit miss. akeqarpoq, taamaa akisutiginera attaveqarniaraanni pilersaarusiortariaqarluni suna angussanerlugu….
… Internetti soorlu Kalaallit Nunaannut naleqqussagaq, nunaqarfiit illoqarfiillu inukitsunnguit imminnut ungasipput sumiiffimmi angallaviluttumi silamillu naalagaqartumi ikiuutaasinnaalluni angisooq. Ungasianit atuartitsineq siuarsarsinnaavaa, videokonference periarfissaavoq aamma suliffeqarfiit illoqarfiit anginerit avataanniittut periarfissarinnerussagaluarput. Siammartitsinerusinnaanerli internettip akiisa qaffasinnerujussuannit akornuteqarput…
Hans Peter Dejgaardip allaaserisani naammassillugu inerniliivoq internettimik atuinerup akiisa appartinneqarnerat namminersortut pisortallu ingerlatsiviisa ineriartortitsinerat pitsanngoriassagaluartoq.
Hans Peter Dejgaardip Ingeniøren.dk-mi allaaserisaa uani takusinnaavat.
Danmarkimi Nunatsinnituulli oqarasuaaserineq kisermassisussaatitaalluni ingerlanneqanngilaq.