Imarsiornermik Aqutsisoqarfik ingiaqatigiilluni angalanermik akerliliivoq
Imarsiornermik Aqutsisoqarfik oqarpoq siunertaanikuunngisaannartoq takornariartaassuit anginerit issittup imartaani ingiaqatigiillutik angalasarnissaat
Siornatigut danskit søfartsstyrelsiat Issittumi nunanit tamalaanit takornariartaassuit angallanerini isumannaallisaanermik piumasaqaatinik pilersitsisoqarnissaanik suliniartut siuttoraat.
Imarsiornermik Aqutsisoqarfik maanna oqarpoq, siunertaanikuunngisaannartoq isumannaallisaaneq pitsaanerulersinniarlugu takornariartaassuit anginerit issittup imartaani ingiaqatigiillutik angalasarnissaat.
Aqutsisoqarfik taamaaliorpoq naak, siorna allaaserisamigut arlalitsigut ingiaqatigiilluni angalasarnissat inerteqqutaalernissaanik suliniuteqareerluni - issittup imartaata ilaanni IMO'p ilaani "Issittumi ileqqussat" 2013mi atuutilersussatut naatsorsuutigisaasut aammalu Nunat Avannarliit Siunnersuisoqatigiivi tamatuminnga sulissuteqaraluartoq.
Ing.dk, Imarsiornermik Aqutsisoqarfimmut apeqqutigaa ingiaqatigiilluni angalasarnissat atuutsilernissaat isumaqatigineraat isumaqatiginnginneraalluunniit.
- Ingiaqatigiilluni angalanerit pillugit qanorluunniit siornatigut allassimagaluarutta, piffissami qaangiuttumi siunertarpiaa saqqummiunneqarpoq. Eqqarsaataasimanngisaannarpoq umiarsuit 200 meterinik ungasissuseqarlutik ingiaqatigiillutik angalasarnissaat. Taamaattoq takornariartaassuit ingerlatsiviinik isumaqatigiinniarnerit amerliartuinnartut naapertorlugit, oqaatsit allanngorput, Per Sønderstrup, Søfartsstyrelsens Center for Maritim Reguleringimi allaffimmi pisortaq oqarpoq.
Maanna Imarsiornermik Aqutsisoqarfik oqalulerpoq, umiarsuit issittup imartaani angalasut, angalanertik ima aaqqissuutissagaat, nal. ak. sisamat iluanni imminnut tikissinnaassallutik, tamanna aamma isumaqarpoq umiarsuit takornariartaassuit imminnut 100-200 kilometerisut ungasissuseqartassanngitsut.