Nanuaraq suli nakkutigaat
Nanuaraq Kangerluup eqqaaniittoq pisortanit malinnaaffigineqarpoq. Nanuaqqap marlunnik ukioqarnissaa naatsorsuutigineqarpoq
Naak, nanuaraq Qeqertarsuup pigisaani Kangerluup eqqaani kisimiikkaluartoq Aalisarnermut, Piniarnermut Nunalerinermullu Naalakkersuisoqarfiup Qeqertarsuarni politiit nunaqarfimmilu kommunefoged suleqatigalugit nakkutigeqqissaarpaat.
Nanuaraq marsip 14'ianni takuneqaqqaarmalli naalakkersuisoqarfik attavigineqarpoq.
Kommunefogedi piumaffigineqarpoq nanuaqqamik aallaasit atorlugit qimaasitsiniaaqqullugu.
- Kingornali nanoq piaraq nunaqarfimmut arlaleriarluni uteqqittarpoq, Naalakkersuisoqarfiullu politiit kommunefogedilu oqaloqatigereerlugit nanoq piaraq inunnut, qimminut pigisanullu ulorianartorsiortitsisinnagu ersisaarlugu qimaatinneqarnissaanik ilitsersuut nalunaarutigeqqinneqarpoq, Aalisarnermut, Piniarnermut Nunalerinermullu Naalakkersuisoqarfik nalunaarpoq.
Naalakkersuisoqarfiup nanup piaqqap qanoq utoqqaassuseqarsinnaanera nammineersinnaalersimasinnaaneranullu tunngatillugu Pinngortitaleriffik attavigisimavaa.
Qanoq utoqqaassuseqarnera portussusianut/takissusianut nanullu piaqqap tumaanik assilisat tunngavigalugit nalilerneqarpoq. Nanoq piaraq 1,5 meter portutigisorinarpoq. Tumai tukimut 12 cm angissuseqarput.
Nannup piaraa marlunnik ukioqarnissaa naatsorsuutigineqarpoq
- Eqqartorneqarnera assilisarlu tunngavigalugit nanoq piaraq marlunnik qaammatialunnguanillu utoqqaassuseqarsorineqarpoq aammalu nammineersinnaasutut ilimagineqarluni. Paasissutissat malillugit nanoq piaraq puallaarippoq. Qanoq nerisarissaartiginerat apeqqutaalluni angissusiat assigiinngisitaarsinnaasarpoq. Nanoq piaraq aamma ukiumik ataatsimik qaammatialunnguanillu utoqqaassuseqarsinnaavoq, taamaappallu suli arnaminik pisariaqartitsissalluni.
Nanoq piaraq nunaqarfimmut utertuaannassappat imaluunniit piaraasoq nammineersinnaanngitsoq paasinarsivissappat Aalisarnermut, Piniarnermut Nunalerinermullu Naalakkersuisoqarfiup allatut ajornartumik kommunefogedimut nanoq piaraq arlaatigut navianartorsiortitsilersinnagu toqutittariaqalersinnaavaa.
Kommunit allaffiinut tamanut, aallaaniarnermik aalisarnermillu nakkutilliisunut politiinullu ilaatigut nannut illersorniarluni toquttariaqalersinnaanerannut maleruagassat ilitsersuutillu nassiussuunnikuupput.