S: Jens B. immami angallavigissallugu navianartumi kisimiilluni angalavoq

Kim Kielsen, Siumut Nunat avannarliit siunnersuisoqatigiivinut ilaasortaq isumaqarpoq ineqarnermut, attaveqatigiinnermut angallannermullu naalakkersuisoq Jens B. Frederiksen imaani angallavigissallugu navianartumi kisimiilluni angalasoq.

- Issittup imartaani ingiaqatigiilluni angalasarnissamut kisimiilluni allaanerusumik nutaarsiassani isummersornera assut tupigusuutigaara.

Kim Kielsen oqarpoq, iIlaatigut Nunat Avannarliit siunnersuisoqatigiiffiata ukiuni kingullerni issittup imartaani umiarsuartigut angallannerup isumannaallisarnissaa pillugu suliaqarsimanera Naalakkersuisunut ilaasortap arajutsisimagaa ersarippoq, ilaatigut kingullermik 03. november 2001-mi København-imi ataatsimeersuarnermi ilaasortat siunnersuutaat A1539 ima oqaasertalik akuersissutigineqarpoq:

Nunat Avannarliit Siunnersuisoqatigiiffiata Nunani Avannarlerni Naalakkersuisunut kaammattuutigai:

• Nuummi isumaqatigiissutip iluani issittup imartaanik alapernaarsuinermik nunat avannarliit suleqatigiinnerat nukittorsarneqassasoq.

• Nuummi isumaqatigiissutip anguniagai naapertorlugit nunat avannarliit sinerissami nakkutilliisuinik annaassiniartartuinillu katitikkanik nunat avannarliit Issittup imartaani umiarsuit atorlugit pinasuarsinnaasunik pilersitsissasut.

• Polar Code-mut atatillugu IMO-mi sulinermut atatillugu nunani ataasiakkaani nunanilu avannarlerni ataqatigiissaarisoqassasoq, taammaaliornikkut nunat avannarliit isumaqatigiillutik sassarsinnaaqqullugit.

• Aalajangersumik piumasarineqalersussaq "Polar code"-p imarisaanik ilisimasaqalernermi tassunga assingusunik nunani ataasiakkaanni piumasaqaateqalernissamik piumasaqarnissaq.

• Issittup imartaata ilaani umiarsuartigut angallannerup isumannaannerusumik ingerlasinnaaneratut naliliiffigisani umiarsuit ilaasunik angallassissutit anginerusut ingiaqatigiillutik angalasalernissaannik piumasaqarnissamik sulissuteqarnissaq.

• Købehavnimi isumaqatigiissummi misilittakkat atorlugit nunani tamannali siammasissumik issittup imartaani mingutsitsinermik akiuiniarnissamik ineriartortsitsillunilu akuersisitsinissamik suliniuteqarnissaq.

• Issittup imartaani upalungaarsimanerup annaassiniartarnerullu annertusiartortinnerata nassatarisaanik aningaasartuutit qaffakkiartuutaat qanoq iliornikkut nunanit avannarlernit aningaasalersorneqarsinnaanerinik misissuinissaq.

Kim Kielsen saqqummiukkusuppaa, Issittup imartaani imaatigut angallannermi isumannaallisaaneq ukiuni kingullerni arlaleriarluni sammineqartarpoq, tassanilu aamma Kalaallit Nunaata imartaani angallanneq aamma sammineqartarluni.

- Nunat Avannarliit siunnersuisoqatigiiffianni Avangatiisinut Pinngortitamillu pisuussutinik ataatsimiititaliami ilaasortaaffinni Kalaallit Nunaata pissutsit atukkatta uagullu piviusumik avatangiisitta paasissutissiissutiginissaa siunertaralugu tikeraarneqarnissaa qulakkeerpara. Umiarsuit takornariartaatit angisuut maanilu angalaartut amerlaqisut ilaat umiuppat, ajunaarnersuaq imaannaanngitsoq pissaaq.

- Tamannarpiaavorlu Nunani Avannarlerni inatsisartuni qinikkat Nunat Avannarliit siunnersuisoqatigiiffiata ataatsimiinnerani pissutsini immikkut ittuni piffiillu ilaanni ingiaqatigiilluni angalasarnissamik piumasaqaammik isumaqatigiillutik akuersinerannut tunuliaqutaasoq, Kim Kielsen tikkuaavoq.

Jens B. imartami ulorianartumi kisimiippoq

- Taamaammat Ineqarnermut, Attaveqarnermut Angallannermullu Naalakkersuisoq Jens B. Frederiksen taamatut suliniarneq akimorlugu aammalu inatsisartuutitat isumaannut ataqqinninngivilluni tassanngaannaq umiarsuit ingiaqatigiittariaqannginnerannik kiisalu umiarsuarnut takornariartaatigut tunngatillugu imaatigut angallannermi sillimaniarnerup pitsaasuuneranik nalunaaruteqarnera assorsuaq tupigusuutigaara. Danskit ministeriat Ole Sohn tupaallatsitaasimassaqaaq, Nunammi Avannarlliit siunnersuisoqatigiiffiata imaani angallannerup isumannaatsuunissaa pillugu isummanik sulianillu ingerlasunik atorfilittaminit ilisimatinneqarsimanngitsoq pasinarmat.

- Jens B. Frederiksen, immami navianartumi kisivit angalavutit, taamaammallu taamatut politikikkut kisaatit suliallu ingerlareersut akimorlugit oqariartuutinik annissaqartinnak eqqarsarluaqqaartariaqarputit, Kim Kielsen oqarpoq.