Cairn suli neriulluaqaaq
Cairnip pilersitsisua siuittaasualu Sir Bill Gammell, Cairnip nunatsinni suliai suli neriuuteqarfigilluarpai
Naak, Skotlandimiut Cairn Energy, Kalaallit Nunaanni uuliamik ujaasinermi aningaasarpassuarnik atuigaluartut, siorna 4,6 milliard dollarsinik iluanaaruteqarput, taamaakkaluartoq Kalaallit Nunaanni uuliamik ujaasinermi aningaasarpassuarnik annaasaqarput.
Ingerlatsinermit aningaasartuutinit takuneqarsinnavoq 1,1 milliard dollarsit ajunaarutaasimasut, ajunaarutillu taakku Nunatta sineriaani qillerigaluarnerni tallimani nassaarfiunngitsuni atorneqarsimasut.
Cairnip pilersitsisua siulittaasualu Sir Bill Gammell suli isumaqartuarsinnarpoq Kalaallit Nunaanni iluatsitsinissamut periarfissat tamat pigineqartut, The Independentimut oqarpoq.
Kalaallit Nunaata sineriaani 2010-mi aamma 2011-mi misissuilluni qillerinerni 942 million koruunit ajunaarutaasut naatsorsuutinit ilanngaatigineqareerput. Uuliasiorfilioqatigiiffik Kalaallit Nunaata imartaani aqqanilinnik qilleriffigisinnaasaqarpoq.