Nanuaraq toqunneqarsinnaavoq

Nannup piaraa arlaleriarlugu eqqartoriigarput ullut tallimat matuma siorna Kangerlummi Qeqertarsuup pigisaani takuneqaqqaartoq ataasinngornermi unnuakkut nunaqarfimmi takuneqaqqippoq.

Unnuakkut illut akornanni innuttaasunit malugineqarani angalaarsimavoq.

Nannup tumai nunaqarfimmi ullaakkut aatsaat takuneqaqqipput tamatuma kingorna nunaqarfiup avataani isiginnaarneqarluni. Innuttaasut ilaasa Nuummi Pinngortitaleriffik kiisalu Namminersornerullutik Oqartussat saaffigaat.

Kingusinnerusukkut Kangerlummi kommunefoged Jensigne K. Olsen, Aalisarnermut, piniarnermut nunalerinermullu naalakkersuisoqarfimmit attavigineqarpoq ilisimatinneqarluni nanoq qimaatinniarneqassasoq.

Nanuarujussuaq pualavoq
Jensigne K. Olsen angummik ikiortilerluni erngerluni snescooterimik nannumik qimaasitsiniaalluni aallarpoq. Nunaqarfiup ungataani illunulli qanittumiittoq siumorpaat.

- Takuinnarlutalu sikumut qimaavoq. Piararujussuaq anaanaminik qimatsisimagunartoq. Pualavoq ajorpasinnanilu, Jensigne K. Olsen Sermitsiaq.AG'imut oqaluttuarpoq.

Angut ikiortaasoq aallaammik sakkortuumik arfinilinnik aallaariarpoq ajunaalernermilu kalerrisaarutit marluk aallartillugit, tamatuma kingorna nanoq sikumut qimaavoq.

- Snescooterimik malersoratsigu erniinnaq qasulerpoq piffissap ilaa 20 meterinik ungasitsigilertarparput, Jensigne K. Olsen oqarpoq.

Immaqa toqunneqassaaq
Aalisarnermut, piniarnermut nunalerinermullu naalakkersuisoqarfimmit kommunefogedimut nalunaarutigaa nannup piaraa nunaqarfimmut qanilleqqissappat toqunneqartariaqartoq.

Nanoq inersimasoq Kangerlummi illut akornini angalaartoq januaari qaammat toqunneqarpoq allallu aamma Qeqertarsuarmi toqunneqareernikuulluni.