Siumut attartortut atugaat assut kammatigaa

Siumup narrutsaatigaa Aasianni pisortat inissiaataanni attartortut kiassarnermik imermillu kissartumik pilersorneqarnerat sivitsortumik ajornartorsiutaasimammat

Siumuts næstformand, Karl Lyberth, Aasiaanni pisortat attartortitaanni najugallit qaammatit marluk sinnerlugit kiassarnermik imermillu kissartortumik pilersorneqarnerat ajornartorsiortaasoq kamassutigaa. Assi: Siumut

Siumumi siulittaasup tullia, Karl Lyberthip, Aasiammiut pisortat inissiaataanni najugallit amerlasuut qaammatit marluk sinnerlugit imermik kissartoqarniarnermikkut kiassarneqarnermikkullu ajornartorsiorsimasut assut naammagisimaanngilaa.

- A/S INI-minngaanit akissaqannginneq patsissiullugu ikiorneqarsinnaasimannginneri akuerineqarsinnaanngilluinnartutut taasariaqarpoq. Taamatuttaaq Naalakkersuisuninngaannit piaarnerpaarpaamik aaqqiissutaagallassutissamik iliuusissanik naalakkiinnginneq kanngunartuliatut taasariaqarpoq, Karl Lyberth kissaammersimaarpoq.

Ilaqutariit pineqartut Naalakkersuisunit utoqqatserfigineqartariaqarput.

- Aappaattut utaqqiisaagallartumik inissianut allanut inissinneqarnissaat sulissutigisariaqarpoq. Tamanna ajornarpat minnerpaamik naammattumik kiassarneqarnissaat pinngitsoornani isumagisariaqarpoq.

- Pingajuattut piffissaq ungasinnerusoq isigalugu ajornartorsiummut aaqqiissutissanik iliuuseqartoqarnissaa naalakkiutaasariaqarpoq, suligasuartumillu sulisitsisoqartariaqarpoq, aqqiissuteqarnissaq piffissami qaninnerpaami peqqullugu.

- Sisamaattut inissiani najugaqartut piffissami pineqartumi inigisaminnut kiassarnermullu akiliinnginnissaat aalajangiunneqartariaqarpoq, akileereersimappatalu akiliutaat utertinneqarlutik, Karl Lyberth naqissusiivoq.

- Naalakkersuisut namminneq pitsaanerpaanik illoqarnissartik kisiat aalluttariaqanngilaat, innuttaasut aamma ineqarnerminni akuerineqarsinnaasunik atugaqartinnissaat ilanngullugu pingaartillugu sulissutigisariaqarpaat – imminnuinnaq piunnaarlutik.

- Siumut isumaqarpoq innuttaasut naligiimmik ataqqinartumillu tunngaveqartumik pitsaasumik sullinneqartariaqartut. Ineqarnermut akitsuutissat kisiisa pingaarnertut isineqaratik piffissanngorlerpoq naalakkersuisut innuttaasut atugaannut pitsaaqutissat salliuttariaqalerneranik.

Powered by Labrador CMS