Kitaani issi

Kalaallit Nunaat sapaatip akunnera tulleq ilanngullugu issikkallassaaq.

Tallimanngornermi kiisami nerummaallalaassaaq. Naqitsiniisaffik kitaata sineriaani pileriartorpoq nittaalalimmik nassatalik, Danmarks Meteorologiske Institut, DMI, ilisimatitsivoq.

- Neruminnerulerallassanngilarli. Kujammut kimmut nunattalu kujataani tallimat qulillu akornanni ississaaq, taamali nillertiginera sapaatip akunnerata naanerani kujasinnerusumit anorit kissarnerumaat takkuppata allanngussaaq. Marlunngorpat nillerteqqissaaq, nunatsinnik silasiortoq Theis Christensen, DMI, ilisimatitsivoq.

Taassuma sapaatip akunnerani aggersumi minus 20 angullugu nillerteqqissinnaasoq ilimagisinnaavaa. Sapaatip akunnerata naanerani nilleq kujataanut aatsaat pisinnaavoq. Maannakkutut itsillugu sapaatip akunnerata tulliata naanissaata tungaanut nilliinnarallassaaq.

- USA'mit Labrador aqqusaarlugu silaannaq kissartoq takkutissaaq. Taanna Kalaallit Nunaata silaannaanut sunniuteqarsinnaavoq. Nilleq Kalaallit Nunaata kitaata Avannaanit kujammukaarpoq, sarfarnera allanngunngippat taamaaginnassalluni, Theis Christensen Sermitsiaq.AG'mut oqarpoq.

Nilleq avannaanit takkuppoq. Canadami naqitsinertuffik nunap avannaanit Kitaanut nillimik aamma pilersuivoq. Marsip aallartinnerani kitaa marloriarluni naqitsinikiffeeqqanit aqqusaarneqarpoq, taakkuali Kitaata avannaaniunerusoq malussaapput.

Silaannarmi sarfat nikeriarsinnaanngitsutut ipput
Silasiortoq naapertorlugu, Kalaallit Nunaata kitaani silaannarmi sarfat marsimi imminnut nikeriarsinnaajunaarsiusapput. Sarfat ingerlarnginik noqitsisartut marluullutik Kitaanut nillimik supooripput. Davisstrædimi naqitsiniisaffinnik pilersoqanngilaq imartarli aqqusaarlugu tunumut ingerlaarlutik.

Issinnerujussua Nunatta sineriaani imaatigut angallannermut sunniuteqarpoq. Royal Arctic Line, RAL, ilisimatitsivoq, sikunera kinguaattoorujussuarnik aamma taamaatitsiinnarnernik kinguneqartoq, illoqarfiit nunaqarfiillu arlallit umiarsuaatileqatigiiffimmit tikinneqanngillat. Sakkutuut imarsiortut ikiorsiullugit sikumik aserorterinerit arlallit ingerlanneqarmata assartugassat ilaat apuunneqarput.

Atuaruk "Mianersoqqussut: Naalungiarsuit illut iluini"

"Hvidbjørnen" sapaatip akunnera qaangiuttoq Narsarsuarmut pivoq, sapaatip akunnera una Igalikomut aqqusiorsinnaasoqarpoq, Qassiarsuk tikinneqarsinnaanngivippoq. Nuup avannaanit nunaqarfiit tamarmik sikumit matusaaqqapput, RAL naapertorlugu sapaatip akunnerata tulliani pissutsit pitsannguumisimanavianngitsut.

Sakkutuut imarsiortut angallataat "Knud Rasmussen", sapaatip akunnerani aggersumi "Arina Arctica" Sisimiunut aamma Maniitsumut aqqutissaani sikumik aserorterissasoq RAL nalunaarpoq.

Ilanngullugu ilisimatitsissutigaat Qeqertarsuup tunuani siku sapaatip akunnerani aggersumi ajornartorsiutaanerulissasoq, tamaani imartap annerpaartaa sikusimammat. Nassataralugu, illoqarfiit nunaqarfiillu arlallit tikinneq ajornartut.

Sikunersua siammariartupiloorpoq

- Silaannaq taama nillertigitillugu imaq gradinik sisamanik tallimanik kissassusilik pilertortumik sikunnguuttarpoq. Kitaani nillera taamaaginnartillugu sikunera qanoq sukkatigisumik siaruaakkiartortoq takusinnaavarput. Kalaallit Nunaata silaannaata nillernerujussuanik allanngortitsisinnaasumik suli takusassaqanngilaq, Theis Christensen oqarpoq.

Aalisarneq sikunerujussuanit eqqugaavoq kitaani umiarsualiviit arlallit sikupput avalattoqarsinnaajunnaarlugu. Arctic Umiaq Linep ilaasunik angallassilluni sinersornera sikumit suli akornuserneqanngilaq. "Sarfaq Ittuk" aatsaat marsip 23'anni angalalissaaq.

- Illuatungaani nunaqarfinnut angallassinerput immap sikuneranit akornusigaavoq. Kitaata qeqqani ilaasussat helikopterimik attartornikkut angallanneqarnissaat aaqqissuuppagut. Tassani Nuuk- Maniitsoq nunaqarfiillu eqqartorpagut, Jette Larsen, Arctic Umiak Linep pisortaanera oqarpoq.

AG sapaatip akunnerani uani issinnerujussuanik sammisaqarpoq. Aviisi nittartakkannut ivertitassaq ataani pisiariuk: