Nannut oqinnerulersut
Immap sikuata annikilliartornerata nassataanik nannut inuussutissaq pisariaqartitartik pinngitsoortarpaat
Nannut atugarliorput.
Nunat nanoqarfittut taagukkat tamarmik Issittup eqqaanniittut isumaqatigiissutigaat, nannut ilungersunartorsiornerat ajornartorsiummit nalinginnaasunngortumit aallaaveqartut: Issittumi immap sikuata annikilliartornera nassataanik nannut nerisaasa pingaarnersaat naatsiit aamma tammariartormata.
Silap pissusaata allanngoriartornera immap sikuata annikilliartorneranut pissutaatinneqarpoq, taamaattoq nunanit tamalaanit ilisimatusartut nannunik misissuinerminni aamma mingutsitsinerup kingunipiluinik misissuineq ingerlateqqippaat. Tamanna ilaatigut Kitaani isiginiarneqartoq, nannut pillugit immikkut ilisimasalik dr. Erik W. Born, Pinngortitaleriffik Politikenimut oqarpoq.
- Paasisat arlallit tunngavigalugit oqaatigineqarsinnaavoq immap sikuata annikilliartornera ilutigalugu nannut ajoraluartumik ikiliartortut. Tamanna Hudsonip kangerliumanersuani Canadap eqqaani malunniutereerpoq aamma Beaufortip imartaani Alaskami - maannalu aamma Baffinip kangerliumanersuani kiisalu Davidsstrædemi, taakkunani Kalaallit Nunaata Canadallu nanui takussaasarput. Amerikamiut canadamiullu ilisimatusartut suleqatigalugit paasivarput Baffinip kangerliumanersuani Davidsstrædemilu nannut oqimaassusaat 1990'ikkunnit annikinnerulersimasoq, Erik W. Born oqarpoq.
- Tamanna isumaqarpoq uumasut ajunngitsumik inuunissaminnut orsukippallaalersimasut. Piffissami tassani aamma imartat marluk sikuat malunnaatilimmik annikinnerulerpoq nassatarisussaallugu sumiiffinni taakkunani nannut ikilisimanissaat - puisinniarnissaminnut periarfissat ajornerulermat nerisarlunnerulerput taamalu oqinnerulerlutik.