Tuluttut ilinniarnissamut periarfissat pitsaanerit
Malik Berthelsen, Siumut naalakkersuisunut saaffiginnippoq, AFS aamma EF aqqutigalugit tuluttut pikkorissarnissamut neqeroorutit paasisaqarfiginerusullugu
- AFS imaluunniit EF aqqutigalugit, inuusuttut annerusumik tuluit oqaasiinik ilinniariartortartut ullummikkornit amerlanerusut aallartalernissaat anguniarlugu suliniutinik sunik aallartitsiniarpisi?
Taama paragraf 37 aqqutigalugu Malik Berthelsen, Siumut sinnerlugu Inatsisartunut ilaasortaq apeqquteqaateqarpoq.
Apeqquteqaanni ilaatigut makkuninnga tunngavilersorlugu:
- Inatsisartut UKA 2010/68-imi Naalakkersuisunut pisussaaffiliipput, inuusuttut ullumikkut nunanut allanut annerusumik tuluit oqaasiinik ilinniariartorlutik aallartartut amerlisarneqarnissaannik suliniutinik Naalakkersuisut aallartitsissasut. Taamatuttaarlu Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap, Naalakkersuisunut sakkortuumik kaammattuutigivaa, siunnersuutip piviusunngortinnissaanut, efterskolertunut tapiisarnertuulli tuluit oqaasiinik nunanut allanut atuariartortartut tapiiffigineqartalernissaannik periarfissanik misissueqqullugit.
- Kissaatiginngilara AFS imaluunniit EF aqutigalugu atuariartortartut allaninngaanniit aningaasanik taperneqartarnerisa nassuiaatigineqaqqinnissaat, Malik Berthelsen oqarpoq.
- Tuluit oqaasiisa qanoq pingaaruteqartigineri tamatta ilisimareeratsigu, itisileqqinngakkaluarlugit oqaatigiinnassavara, meeqqat atuarfianni tuluit oqaasiinik misilitsittut (2009) 30 %-iisa karakteri 5-imik taassuminngaluunniit appasinnerusumik karaktereqarnerisa uppernarsarpaat, siunnersuutip piviusunngortinnissaata qanoq pingaaruteqartiginera.