Anaanaq panialu kræftimik nappaatilik tammaaneqarput

Arnaq kalaaleq panini kræftimik nappaatilik ilagalugu nikallungalluni ingerlasimasoq, Danmarkimi politiinit ujaarineqalerpoq

43-nik ukiulik Vilhelmine Magnussen Jyllandip avannaani Politiit ujaaraat. Arnaq taanna arfininngormat kingullermik takuneqarsimavoq. Ass.: Nordjyllands Politi Sisamanik ukiulik, Arnaq, Jyllandip avannaani Politiinit ujaarineqarpoq. Taassuma anaanani ilagalugu arfininngormat tammaaneqalerput. Ass.: Nordjyllands Politi

Arnaq kalaaleq 43-nik ukiulik arfininngormat tammaaneqalersoq Jyllandip avannaani Politiit ujaaraat. Arnap panini, Arnaq, sisamanik ukiulik ilagisimavaa.

nordjyske.dk taamatut allaaserisaqarpoq.

Arnaq 43-nik ukiulik Vilhelmine Magnussen kingullermik takuneqarpoq arfininngormat nalunaaqutaq unnukkut arfinernut, sakikkumini Aalborg Øst-imi Sallingsundvejimi. Arnap panini sisamanik ukiulik ilagalugu nikallungalluni tasssanngaanniit ingerlasimavoq.

- Arnaq nikallungammat paniatalu napparsimanera eqqarsaatigalugu, Jyllandip avannaani Politiit isumakulupput, Jyllandip avannaani Politiini pigaartoq, Frank Liltorp, nordjyske.dk-mut oqaluttuarpoq.

Ullumi marlunngornermi aatsaat ilaqutai politiinik kalerriisimapput.

Vilhelmine Magnussen imatut isikkoqarpoq:

  • nalinginnarmik pualalaarpoq
  • naatsunik qernertunik nujaqarpoq
  • tungujortumik jakkeqarpoq

Sisamanik ukiulik, Arnaq, imatut isikkoqarpoq:

  • 120 centimeteritut angitigaaq
  • saluttuuvoq
  • naatsunik qernertunik nujaqarpoq
  • kingullermik takuneqarami aappalungusertumik pink-imik qalipaatilimmik jakkeqarpoq, qaamasunik koorpunik qarleqarpoq lilla-nillu qamippaqarluni.

Jyllandip avannaani Politiit ujaarlerneq pillugu saaffigineqarsinnaapput, oqarasuaatip normua una atorlugu: (0045) 114.

Powered by Labrador CMS