Air Greenlandip ukiumut naatsorsuutai pitsaasut
Nunatsinni timmisartuutileqatigiit akileraareerlutik ukiumut naatsorsuutini 51.3 million koruuninik sinneqartoorput
Suliffeqarfissuaq Air Greenland 2011-mi akileraarutit piinnginnerini 75 million koruuninik sinneqartoorpoq. Akileraarutit peereerlugit 51,3 million koruuniusunik.Ukiumut siulianut sanilliullugit qaffariaataallutik 12,5 aamma 10,2 million koruunit.
- 2011-mut ukiumut naatsorsuutit ataatsimut isigalugot tulluussimaarutigisinnaavagut. Suliffeqarfissuup sulisui sullissilluarniarlutik ulapissimaqaat, siulersuisuni siulittaasoq Jens Wittrup Willumsen oqarpoq.
2011-mi angusat siulersuisunit naammagisimaarneqarput. Pitsaasumillu angusaqarnermut pissutaarpiarpoq timmisartunik attartortitsinermik ingerlatsiviup, ingammik niuerfinnut nutaanut pingaartumik uuliasiornermut aatsitassarsiornemullu tapertatut atorluarneqarsimanera.
Attartortitsinermut immikkoortortami DASH-7-nik minnerunngitsumillu qulimiguulinnik AS 350-nik nalunaaquttap akunnerinik atuineq ukioq manna rekordiliiffiuvoq, atorneqarsinnaanerinit 96% -mik atorneqarmata. Tamannalu uuliasiornermik aatsitassarsiornermillu ingerlatsisoqarneranik aammalu sanaartortoqarneranik tunngaveqarpoq, soorlu Ilulissani Paakitsumi erngup nukinganut nukissiorfiliorneq.
Niuerneq naleqqussarneqarpoq
Suliffeqarfissuup kaaviiaartitai ukiup siulianut sanilliullugit aamma qaffariarput, suliallu annertusigaluartut sulisut 2010-misut amerlatigaat. Air Greenlandillu taamaasilluni takutippaa Kalaallit Nunaata uumaatsunik pisuussutaasa nunanit tamalaanit soqutigineqarnerisa annertusiartornerani niuernikkut ingerlatsivimminik periarfissanut naleqqussarsinnaanini.
-Ukiumullu angusat pitsaasut piginnittuusunit naammagisimaarneqarnerat tunngavissaqarluarpoq, tassami ilaasorisartakkat ikileriarnerat, unammillerneqarnerup annertusinera, orsussap akiata qaffakkiartupiloornera, akitsuutillu qaffannerisa timmisartuutileqatigiinnik atuineq sunnermagu. Taamaakkaluartorlu ingerlatsivup aningaasartuutit alaatsinaattuarnerisigut unammillerfiusuni arlalinni 2011-mi akinik appaasinnaasimavoq.
- 2011-milu timmisartut pilersaarutit malillugit aallartarnerinik tikittarnerinillu piffisamik eqquisarnissamik immikkut ittumik suliniuteqarneq pitsaasumik angusaqarfiuvoq. Tassa timmisartuussinissanik pilersaarutini aallarfissaasut 15-minutsit iluini pisartut 2010-mi 62,0 %-iusut 2011-mi 71,7 %-mut qaffapput.