Innuttaasut allannguinissamut piareersimapput
Innuttaasut aatsitassarsiornermi uuliasiornermilu inuussutissarsiutaalersussat isumalluarfigaat, naalakkersuisut siulittaasuat oqarpoq
Naalakkersuisut Sisimiuni Aasiannilu 'ornigarneqarluartunik' innutaasunik ataatsimiititsipput.
Oqallinnerni oqallisigineqartut siammaseqaat meeqqat atuartitaannerannit siunissami inuussutissarsiutaalersussanut. Najukkani pissutsit aamma tikinneqarput.
- Naalakkersuisut naalakkersuinikkut suleqqinnissaminni immersorneqarluarput, naalakkersuisut siulittaasuat Kuupik Kleist oqarpoq.
- Apeqqutit assigiinngitsut naalakkersuinikkut massakkut sammineqartut innuttaasunit qanoq isumaqarfigineqarnerat tusassallugu pingaaruteqarpoq. Inuiaqatigiittut unammilligassagut ilisimalluakkagut innuttaasunit isummersorfigineqarnissaat pingaaruteqarpoq. Innuttaasunik ataatsimiititsinitsinni maluginiarparput siunissamut isigaluni allannguerusussuseqartoqartoq.
- Pingaartumik maluginiarparput, innuttaasut utoqqaagunik inuusuttuugunilluunniit – aatsitassarsiornermi uuliasiornermilu inuussutissarsiutaalersussat isumalluarfigigaat. Maannamut oqallinnernit ersersinneqartarsimasunit allannguinissamut piumassuseq annertunerujussuuvoq. Tamakkiisumik oqariartuutigineqarpoq Kalaallit Nunaata aningaasatigut nammineq nappassinnaasaminik ineriartulernissaanut alloriarneq tulleq ingerlanneqartariaqartoq, Kuupik Kleist naggasiilluni oqarpoq
Innuttaasunik ataatsimiititsinerit Ilulissani Uummannamilu sapaatip akunnerata uumma ingerlanerani nanginneqassapput soorluttaaq Ikerasanni, Ukkusissani Saattunilu aamma innuttaasunik ataatsimiititsisoqassamaartoq. Piffissaq sumiiffissarlu allargartaliissutigineqattassaaq.