Canadamiut qallunaanik sungiusaaput

Tunumi sakkutuut Forsvarets Vagt Mestersvig issittumi sungiusarneq ingerlatileruttorpaat. Marsip 2-anni canadamiut ranger-it marluk pilersaarutigineqartutut Iqalunnit tikipput. Qallunaanit peqataapput Jægerkorpset aamma Siriusimi alapernaarsuisut. Taamatut paasissutissiivoq Kangilinnguani Sakkutooqarfik nittartakkamigut.

2012-imi Issittumi Sungiusarneq Canadap Danmarkillu suleqatigiinneraat, siunertaalluni issittumi misilittakkanik taarseeqatigiinnissaq. Sungiusarneq suleqatigiinnerup, canadamiut 2010-mi Nunavummi sungiusarnermut atatillugu suliniutaata, nanginneraa.

Sungiusarneq ingerlanneqarpoq marsip 2-anniit 16-iata tungaanut, immikkullu sammineqassalluni snescooterimik ingerlanermik misilittagaqalernissaq, tamatuminnga canadamiut ranger-it misilittagaqarluarlutik.

Atortut pitsanngorsarnerisa saniatigut nukippassuit aamma atorneqarput Siriusimi alapernaarsuisartut snescooterersinnaassusiisa ineriartortinnissaat, snescooterimik ingerlatsinermik misilittagakimmata, nittartakkami allassimavoq.

Angutit tamarmik paasivaaqt silarluttumi apummilu aqitsumi snescootererneq imaannaanngitsoq, qamutinillu 3-400 kiilunik kalilluni marrinnaneersaarluni suliuartariaqarpoq. Ullut marlussuit immap sikuani manissumi nunamilu maniitsumi sungiusareerlutik ilikkariartorluarpaat, Mestersvigimi sungiusarneq pillugu nalunaarummi allassimavoq.

Sungiusarnermi peqataasut aamma kangerlummiissimapput tammaarsimaffik inissikkiartorlugu ilaatigullu nannunut kalerrisaarut misilinniarlugu. Ulluinnarni Siriusimi alapernaarsuisut nanoqarneranik qimminit tusarlerneqartarput, maannali qimmit snescooterimik taarserneqarallarmata taarsiullugu kalerrisaarutit atorpaat.

Issittumi sungiusarnerup sinneranut pilersaarutaapput Forsvarets Vagt Mestersvigip avannaani kangerloqarfimmi alapernaarsuinermik ujarlernermillu sungiusarneq. Ilisimasassarsiortunik tammartoqartitsisuusaarpoq nassaarineqartussanik.

2012-imi Issittumi Sungiusarneq marsip 16-ianni naassaaq, Kangilinnguani Sakkutooqarfik paasissutissiivoq.