Liza arpattaqqilerpoq
Liza Tuperna Itzchaky Copenhagen Marathonimut, maajip 20-ianni ingerlanneqartussamut, piareersarpoq
Liza Tuperna Itzchaky sapaatiummat arpannermik sungiusalerpoq Nike Marathontest 2-mullu, 15 kilometerimut arpannermut, peqataalluni.
- Sila nuannersorujussuuvoq, Liza nalunaarummini oqaluttuarpoq.
- Nillilaarluni arpaffiup ilaani anorlilaarluni, arpattulli amerlaqimmata malinnaaginnartariaqarpoq arpattut allat tunuanni oqquisimalluni, anorimut assorpallaaqqunani.
- Nakkutigisaasumik arpappunga. 5 kilometerikkaarlugit killiffimmi piffissaliisoqartarpoq. 5 kilometerit siulliit ingerlasimavakka atorlugit 20.51 minutsit, tullii 5 kilometerit 20.32 minutsit kingulliillu 5 kilometerit 20.01 minutsit. Kilometeri kingulleq, 14 kilometerimiit 15 kilometerimut sukkaffiginerpaavara atorlugit 3.43 minutsit. Arpaffik naallugu atorpakka 1.01.25 timit, arnani normu 4-ranngorlunga, normu 3-ngortumit Nana Hengstenbergimit, 42-nik ukiulimmit klubbeqatinnit, sekundinik tallimaannarnik kigaannerullunga. Taassuma arpannini 5 minutsinik pitsanngoriartippaa! Ajugaavoq Sine Gasbjerg, aamma klubbeqatiga, atorsimalugit 56.37 minutsit, normu 2-ulluni 55-inik ukiulik Vibeke Hansen SNIK-meersoq, atorsimallugit 1.00.23 timit.
Liza Tuperna Itzchaky tullianik unammissaaq nunaannarmi arpalluni 10 kilometerimut DM-imi, taannalu marsip 25-ianni ingerlanneqassaaq Københavnimi Østerbromi.
Kalaallinik illersorneqarnissani neriuutigaa. Minutsillu 39-t ataakkusuppai, sulili qasusuinnerpaaffimminut pisimanngilaq minutsillu 40-t ataatissagunigit nuannaassalluni.
Liza Tuperna Itzchakyp upernaaq manna anguniagaasa pingaarnersaraat Copenhagen Marathon, aamma Danmarkimi pissartanngorniunnerusoq, maajillu 20-ianni ingerlanneqartussaq, sulilu ima qasusuitsiginissaq anguniarpaa akunnerit pingasut ataakkusullugit.