Pissaanillit akornanni
Qaqortumi niuernermik ilinniartut NI Qaqortoq Namminersulernissamut ataatsimiititaliarsuarmi sulineq tipisiorpaat
Cand.scient.pol Jakob Janussen, ataasinngorneq marsip aqqaneq-aappaat nalunaaqquttap akunnera ataaseq affarlu aalajangiisartut qanimut suleqatiginerat pillugu oqalugiassaaq.
Tamanna pissaaq NI Qaqortoq nal. 10.00 – 11.30.
Jakob Janussen nunatsinni ineriartornermi nutaajunerusumi ukiorpassuarni sunniuteqarsimavoq, siullermik Ministeriet for Grønlandimi, kingorna Landsrådit allattoqarfianni, Namminersornerullutik oqartussani aammalu namminersorluni oqartussani immikkoortortani arlalinni. Kalaallit Namminersorneq pillugu isumalioqatigiissitarsuani siulittaasuunikuuvoq aamma kalaallit danskillu namminersorneq pillugu ataatsimiititaliarsuaani allaffimmi pisortaalluni. Taamakkua saniatigut allaaserisat arlaqaqisut suliarai ilaatigut nunatsinni isumaqatigiinniartarnermi ileqqussat, Nunatsinni politikkikkut ineriartorneq aamma kalaallit danskillu imminnut ataqatigiinneri.
Oqalugiarneq niuernermik ilinniarfiup atuartitsineranut ilaavoq, inuit pingaarutillit "pissutsinik piviusunik" oqaluttuaqqullugit qaaqquneqartarput. Ilaatigut oqalugiartinneqarnikut tassaapput Nuka Andreassen, Arctic Green Food, Kenneth Høegh, Cand. agro aamma siornatigut Nunalerinermik uumasuuteqarnermillu siunnersortaasimasoq kiisalu Nickie Isaksen, Isaksen design.