Qatserisartut suliumajunnaarnissamik sioorasaaripput
Isumaqatigiinniarumanngikkussi suliumajunnaassaagut qatserisartut tutsiupput. Taakkuli isumaqatiginiarfiumaneqanngillat
- Akueriuminaappoq Namminersorlutik Oqartussat piumasarissappassuk nunatsinni saniatigooralugu qatserisartut ulloq unnuarlu assigiimmik ajutoorfimmut orniguttassasut – saniatigullu atorfeqarnikkut akissaatitigut inatsisitigullu illersortigisinnaasaannik qulakkeerinnikkumanatik. Maanna piffissami sivisuallaalersumi inissismaneq akuerineqarsinnaanngitsoq atorneqarpoq, tamannalu akuereqqissinnaajunnaarparput.
Taama oqarpoq Kalaallit Nunaanni Qatserisartut Peqatigiiffianni siulittaasoq Poul Olsen
- Pissutsip akuerineqarsinnaanngilluinnartup tamatuma kingunereratarsinnaavaa siunissami qaninnerusumi qatserisartut sulinerminnik unitsitsillutik kalerrisaarutinik qatserutaasivinnut tuniussisariaqarlerannik, tamannali ingerlanneqassaaq Namminersorlutik Oqartussat paasinnilernissaasa tungaanut. Ileqqorissaartumik pineqarusuppugut, sulinermut akissaatitigullu isumaqatigiissummik tamatta iluarisimaakkatsinnik inissiinissarput.
- Saniatigooralugu qatserisartuusugut peqatigiiffeqarpugut ataatsimoorfigisatsinnik, ulorianartunik, inuiaqatigiinnulli pingaarutilerujussuarnik suliaqartarpugut, minnerunngitsumik ilaquttatsinnit ujariatsineqartarluta, sunngiffinnilu soqutigisanut amerlasuunut mattusimasinnaasarluta.
- Isumaqatigiinniarnissamut takkunniarisi, taamaanngippat suliumajunnaassaagut, Poul Olsen naggasiivoq.