Sillimaniarneq siulliussaaq

Taama oqarpoq Europa-Parlamentimi ilaasortaq Vicky Ford Issittumi uuliamik gassimillu ujaasineq EU-mi oqallisaammat

- Kalaallit Nunaanni sillimaniarneq qaffasinnerpaaffissamiippoq. Aatsitassanut inatsit danskit aatsitassanut inatsisaannut aamma canadamiut qulakkeerinninnissamut piumasaqaataannut qaffaseqisunik ilaqarpoq, Sinniisoqarfimmi pisortaq Lida Lennert nassuiaavoq. Assi: Arktis Media

Parlamentip ”Issittoq pillugu Oqalliffiani ilaasortai” aamma parlamentimi ilaasortat pingasut Herbert Reul, Kristumiut Demokraatit, Vicky Ford, Europæiske Konservative & Reformister aamma Michael Gahler, Kristumiut Demokraatit, marsip arferngat ”Europap Issittortaani uulia gassi: misilittakkat ineriartorneq” quleutserlugu ataatsimiipput.

Avatangiiseq pillugu illersuiniaqatigiit siuttui ilaatigut Namminersorlutik Oqartussat sinnissoqarfiani pisortap Lida Lennertip inissippai, aatsitassanut inatsit erseqqissaatigalugu.

Aaqqissuisut oqariartuutaat erseqqippoq. Uuliamik ujaasinermi qillerinermilu sillimaniarneq salliutinneqassaaq, pingaatumik issittumi avatangiiseq innarliasoq pineqartillugu.

Issittoq Europaanngilaq
- Issittoq Europaanngilaq Europamulli attuumassuteqarluni taamaattumillu Europaparlamentimi Issittumi pissutsit oqaluuserisassanngortinneqarsinnaallutik, Vicky Ford ataatsimiinnermik peqataasut 120-t aammaalluni oqalugiarfigai. Avatangiisimut annertuumik sunniuteqarsinnaasut pineqartillugit sillimaniarneq pillugu isumaqatigiinniaannarluni naapiffiit atorneqassanngillat, Vicky Ford oqarpoq, taassuma upernaaq Europa-Parlamentimut Issittumi uuliasiorluni qillerinerit inerteqqutaalernissaat oqaluuserisassanngortippaa. Akuerineqaranili.

Vicky Fordip annaassiniartoqartillugu sillimaniarneq annermik paasisaqarfigerusuppaa.

- Maani kikkut tamarmik seqinnarissuaq nassuiaateqarfigaat. Erseqqissunik piviusunillu paasisaqartariaqarpugut, parlamentimi ilaasortat allat uppernarsisinneqassappata, uuliamik gassimillu ujaasinermi sillimaniarneq qaffasinnerpaamik ingerlanneqartoq, Vicky Ford oqarpoq.

- Annaassiniarneq uuliakoornerluunniit silarluttorsuugaa ersernerluttoq unnuakkut tarrup ataani iluliarsuit akornini ingerlassappat, suliassaq teknologi atorlugu isumagineqarsinnaava raadarit, misiginiutit laserit qullii aappalaartut uuliakoornermik annertussusiliisinnaappat? politikkeri qularisalik isornartorsiuisartorlu oqarpoq.

Taassuma saniatigut politikkereqataa Michael Gahler taama qularpalutsigaluni nunatsinni aatsitassanut inatsisitsinnut isummaminik anitsivoq.

Aatsitassanut pisortaqarfiup piumasaqaatai Social Impact Assessement (SIA aaq.) aamma Impact Benefit Agreement (IBA aaq.) europami atuuttunut nallersuullugit qanoq ippat? Kineserit suliffeqarfiutaat SIA’mik appasissumik siunnersuuteqarpat, IBA’mulli millionilippassuarnik neqeroorluni, taava IBA qaffasissoq pillugu Kalaallit Nunaat isumaqatigiissummik atsiussava? Michael Gahler aperaaq.

Aatsitassanut inatsit danskit inatsisaannit aallaaveqarpoq

- Kalaallit Nunaanni aatsitassanut inatsit danskit inatsisaannit tunngavilik 2009-mi namminersornerup eqqunnerani aallaaviuvoq, nunatta Bruxellesimi sinniisoqarfiani pisortaq Lida Lennert akivoq.

- Aatsitassanut inatsit 2010-mi januaarip aallaqqaataa aallarnerfigalugu suliassaqarfiit akisussaaffigilikkat siullersaraat, Lida Lennert parlamentarikerinut qulartunut nassuiaavoq.

- Taassuma saniatigut Aatsitassanut pisortaqarfik aamma Namminersorlutik oqartussat ulloq ataaseq aallartinngillat. SIA aamma IBA’t Jørgen T. Hammeken-Holmip (Aatsitassanut pisortaqarfimmit aaq.) saqqummiunneqartut canadamiut malittarisassaat Kalaallit Nunaanni pissutsinut nalimmassarlugit suliaapput, Lida Lennert nassuiaavoq.

Taakkua saniatigut Kalaallit Nunaanni malittarisassat malinneqartut Issittumi Siunnersuisoqatigiinnit aalajangigaapput, taakkununnga ilaallutik Imaatigut Sillimaniarnermi aaqqissuussineq nutaaq – SAR. Aalisarneq suli Kalaallit Nunaanni inuussutissarsiutit pingaarnersaralugulu annersaraat, taamaattumik suliassaqarfimmi tassani susassaqartut tamarmik suliniutinut nutaani eqqarsaatigineqartarput, Lida Lennert akivoq.

Powered by Labrador CMS