Jørgen Lund pillugu eqqaaniut
Ane Hansen, Jørgen Lund pillugu allappoq - taanna Narsami borgmesteriunikuuvoq. 49-nik ukioqarluni toquvoq
Narsami borgmesteriusimasup savaatillip Jørgen Lundip toqukkut qimagunnera pillugu aalisarnermut, piniarnermut nunalerinermullu naalakkersuisoq Ane Hansen oqaatsit makku atorlugit Jørgen Lund, 49-nik ukioqarluni toqusoq eqqaaniarpaa:
Alianaqisumik tusarpara piaarpallaamik Jørgen Lund toqukkut qimaguttoq. Kalaallit nunaat ernerulluartumik annaasaqarpoq, minnerungitsumillu kujataani savaatillit ikingummik qanilaartumik piginnaaneqarluartumik annaasaqarput.
Jørgen Lund savaatilinni peroriartorpoq. Meeraanermini peroriartorfini Inneruulalik ataataminik savaatilimmik Dolph Lundimik ingerlanneqarsimasoq ingerlateqqippaa. Piffissallu ilaani Narsami Borgmesteriuvoq, maannamullu Nunaqarfinni Aqutsisuni sunniuteqarluarlunilu suleqataalluni.
Jørgen Lund toqussi tikillugu Nunalerineq pillugu Siunnersuisoqatigiinni siulittaasuuvoq. Aalisarnermut, Piniarnermut Nunalerinermullu Naalakkersuisoqarfik sinnerlugu Jørgen Lund qutsavigerusuppara nuannersumik pissarsiffiulluartumillu suleqatigisimagatsigu.
Jørgen Lundip Nunalerineq pillugu Siunnersuisoqatigiinni siulittaasutut sulinermini Savaatillit Peqatigiit Suleqatigiissut siulersuisuini piffissap ilaani sulisarsimanerminilu kalaallit nunaanni nunalerinermik inuussutissarsiuteqarnermi ineriartorneq malunnaatilimmik sunniuteqarfigisimavaa. Qiimasuunera piginnaasarpassuilu maqaasissaqaagut.
Jørgen Lundip nulianut, qitornaanut ilaqutaanullu misiginneqatiginninnera apuukkusuppara, inuugallaramilu suliatigut sunniutigisimasai pillugit qujaniarnerput apuukkusullugu. Eqqaaneqarnera ataqqinartuuli.