Belha Sisimiuni ukiup arnatsialaa

Ippassaq marsip arfineq-aappaanni nunarsuaq tamakkerlugu arnat ulluanni Sisimiuni ukiup arnatsialaa toqqarneqarpoq.

Arnat suliniaqatigiiffiat Sisimiuni arnatsialattut kina toqqassallugu nalorninngillat

- Arnat Ulluannut atatillugu Sisimiuni Arnatummut nersornaaserneqarpoq Belha Ferdinansen, Biillaat. Arnat Ulluat Kommitep isumaqatigeeqqissaarluni Biillaat toqqarpaat, inuiaqatigiit ilutsinni arnarpassuit ersinngitsumik inuiaqatigiinnik napatitsisut sinnerlugit. Arnaq tusagassiutini politikkimilu tusarsaasuunngilaq. Paasiniaanitsinnilu uku oqaatsit utertuarput: Arnaq ajunngitsoq, naammagittartoq, asannittoq, uiminik paaqqutarinnilluartoq, maalaartuunngitsoq, qiimasoq, nuannaartoq.

Siunnersuuteqartup allagaa imaappoq:

”Utoqqasaat rullestolertullu Sisimiuni angallattalerakkilli maluginiartarpara Belha Ferdinansen, arnaarannguaq tuattoq, ullut tamaasa uiminut Seth Ferdinansenimut isumaginnilluartoq. Tupinnartaqaaq nukeqartassusia rullestolit uimi issiavigisartagai imaannaangitsut kivissinnaasutulluunniit ittarmagit.

- Ukiorpassuarni taamatut iuminut isumaginnittuartuuvoq, takusinnaasarparalu ullut tamaasa nukissaqarluartartoq – tassa ullut tamaasa ataasinngornermit tallimanngorneq ilanngullugu Utoqqaat Angerlarsimaffianukaassigaangama ataasiaannarlungaluunniit tusaanikuunnginnakku maalaartoq – naak uimi Sethip aqqutaani arlaleriarujussuarluni pisaraa ”Biillaat, Biillaat, Biillaat, kinaana”, uiami tappiitsuuvoq taamaalilluni nuliami takusaaanik apersortarlugu

Tupigisaqaara taama atugaqartitaanermini naammagittarluni atortuarmagu, qassiiliunngivilluni akuersaartutut pissuseqarfigisarpaa – taamaatut atugaqarpoq ullut tamaasa ukioq naallugu. Aappariinni taakkunani Angerlarsimaffimmi ikiortinik takusaqarnikuunngilanga – oqaannassaanga uanga taama atugaqartitaasimagaluaruma qangarsuarli nakkaannareeraluarpoq, Kári vid Stein, Belhao Sethillu taxanik ingerlatitsisorisartagaat oqarpoq.

Kárip Biillaat uialu Taseralimmut neriartoqqullugit qaaqqusimavai ”aninlaarniassammatagooq”. Paasitinneqannginnamik sooq qaaqquneqarnerlutik unnuup ingerlanerani Seth-ip, Biillaap uiata, nuliani aperisarsimavaa sooq taama iliorneqarnerlutik.

Biillaat killitseqaluni nersornaaserneqarnini tiguaa, ilimagisimanngilluinnaramiuk taama pineqarnissani. Centrum Kioskenimit naasunnappoq, Clinique Passussivimmit massagertinnissamut tunineqarluni aammalu pisiniarfimmit Qiviunit benvarmerinnalluni puisip amianik sanaanik kusanangaartunik.

Siunnersuutigineqartut allat tassaapput:

• Marianne Olsen
• Anna-Lise Kreutzmann
• Johanne Jeremiassen
• Dorthe Ivalo Lennert Jensen
• Kathrine Larsen Lennert
• Anita Høegh
• Ane-Marie Bjørn
• Rosa Olsen