Atassut: Arnat persuttarneqartarnerat
Ullumikkut nunatsinni tarnikkut timikkullu arnanut nakuusertarneq atugaaqaaq, Atassummiit Arnánguak’ Blytmann marsip 8-ani allappoq
Arnánguak’ Blytmann Atassummi aaqqissuussaanikkut siulittaasup tullia marsip 8-anut atatillugu oqallissaarummini tarnikkut timikkullu arnat nakuuserfigineqartarnerat sammivaa.
Arnánguak’ Blytmannip oqallissaarutaata ilaa aaqqissuisoqarfimmit tigulaariffigaarput:
- Nunatsinni tarnikkut timikkullu arnanut nakuusertarneq atugaaqaaq, tamannali qaqutikkuinnaq inuiaqatigiinni toqqaannartumik takusarparput, kiammi kiinnamini tilluusat nittarsaattarpai? Nakuuserfigineqarneq taamaalillunilu inooqatigisamit naammattumik asaneqannginneq naammareerpoq illoqarfimmi nittarsaatinngikkaluarlugu oqallisaallunilu, inunnillu allanit immaqa oqarfigineqarluni aapparisaq qimaqqullugu.
- Tamassuma eqqarsaatiginissaa sakkortusinnaavoq, taamaattumi arnat nakuuserfigineqarsimasut illoqarfimmi takussaaneq ajungajapput, taamaattumillu ajornartorsiut inuiaqatigiinni ammasumik oqaluuserineqarani, Arnánguak’ Blytmann allappoq.
Læs "Her er 8. marts-talen fra Aleqa"
- Arnaq kiinnamigut tilluusartoq naapikkutsigu imaluunniit arnaq aqqusiniinnarmi nikassarneqartoq takkugutsigu immaqa eqqumiigissavarput soor angut taanna qimannginneraa, aappariimmi ulluinnarni isumaqatigiissinnaanngitsut tusaraangatsigik aamma eqqartortarparput sooq taama isumaqatigiinngitsigalutik qimannginnersut.
Taamaattumik nakuuserneq arnat isiginngitsuusaartarpaat
- Eqqaamasariaqarparpullu arnaq tarnikkut timikkullu nakuuserfigineqartartoq iliuuseqarnissaminut nukissaqarneq ajormat. Meeraqarluni nakuuserfigineqarnermini meeqqani takutinnaveersaartarpao, takunnissimatillugillu meeqqami nakuuserfigineqarnissaat pinaveersimatinniartarlugu, nakuuserfigineqarnermilu kingornatigut meeqqani tuppallersartariaqarsimassavai, taamaalilluni nukippassuarnik atuereerluni. Imminullu nukissaqarfiginani.
Læs "Kvindegruppe klar til kampdag"
- Aamma eqqaamasariaqarparput arnaq nakuuserfigineqarsimasoq ukiorpassuarni inuttut nikiassarneqarsimasarmat atorsinnaanngitsuunerarneqarluni, taamaattumillu iliuuseqarnissani immaqa nukissaqarfiginagu. Taassuma saniatigut immaqa qamuuna inuunermik nuannersumik takorluugaqarpoq, angutip asasami immaqa ima asatigigaani nammineq iliuuseqarluni nakuuserunnaarlunilu, pilluartumillu inuuneqalersinnaallutik, Arnánguak’ Blytmann nangilluni allappoq.
Inuiaqatigiinni kingornuttakkap anigornissaa
- Inuiaqatigiit arnanut nakuuserfiusut, kinguaassiutikkut atornerluiffiusut imigassamillu atuipiluffiusut ima sulinissamut pikkoritsigilissanngillat nuna pitsaasumut aallartissinnaallugu, taamaattumik ajornartorsiutitta iluuuseqarfiginissaannut pisussaaffeqarpugut.
- Nunatsinni ullumikkut arnat sorsuffianni tamanna tunngavigissallugu ersernerlukkaluartoq ulloq manna atortariaqarparput takussaanngitsumik arnanut iliiserineqartut akernilernissaannut. Qulakkeertariaqarparput arnat nukittunerulernissaat inuunertik iliuuseqarfiginnaalerlugu, taamaalillutik kingornuttagaq anigorlugu, Arnánguak’ Blytmann allappoq.