Borgmesteriusimasoq toquvoq

Narsami borgmesteriusimasoq savaatilik Jørgen Lund piffissami sivisuumi napparsimasimalluni toquvoq, 49-nik ukioqarluni.

Narsami borgmesteriusimasoq savaatilik Jørgen Lund piffissami sivisuumi napparsimasimalluni toquvoq. Assi: Leiff Josefsen

Savaatilik, politikeri borgmesteriusimasorlu Jørgen Lund toquvoq. 49-nik ukioqalerpoq.

Savaatilittut siuarsimasunut naalakkersuinermillu sulialittut siumut isigisutut ilisimaneqarpoq. Toqussi tikillugu Igalikumi, Narsarsuarmi Qassiarsummilu nunaqarfinni siulersuisuni siulittaasuuvoq IA sinnerlugu qinigaalluni. Jørgen Lund aamma landbrugsrådimi siulittaasuuvoq.

Naalakkersuisut siulittaasuat Kuupik Kleist IA misiginneqatigiissummi "Ikinngut suleqallu toquvoq" qulequtaralugu ima allappoq:

- Joorut Igalikup, Narsarsuup Qassiarsuullu nunaqarfiisa siulersuisuini siulittaasoraat. Joorut isumatuumik piumassuseqarpaluttumillu eqqarsartaaseqarpoq taamaattumillu Inuit Ataqatigiinni nuannersumik, piviusunngortitsiffiulluartumillu suleqammik annaasaqarpugut. Ukiorpassuarni inuiaqatigiinni sunniuteqartumik suleqataavoq piffissallu ilaani Narsami borgmesteriusimalluni. Kujataata ineriartorneranik sunniuteqarluarsimasumik savaatilimmik politikkermillu pikkorissumik annaasaqarpugut.

-Qitornangui nulia ilaqutaalu allat tamarmik Inuit Ataqatigiinniit qamannga pisumik misiginneqatigaagut. Joorup eqqaamaneqarnera ataqqinartuuli.

Powered by Labrador CMS