Mingutsitsineq inoorlaat suiaassusaannik aalajangiisuuneq ajorpoq
Misissuinerup nutaap takutippaa Kalaallit Nunaanni inoorlaat suiaassusaat nikingassuteqanngitsoq, naak ilisimatuut taama isumaqarsimagaluartut
Nalinginnaasumik nukappiaqqat inunngortut niviarsiaqqanit amerlanerusarput, taamaattumik ukiut tallimat matuma siorna nunarsuarmi tamarmi uissuummissutaavoq Kalaallit Nunaanni Ruslandillu issittortaani niviarsiaqqat inunngortartut nukappiaqqanit marloriaammik amerlanerummata.
Tamatunami peqqutaasutut suaarutigineqapallappoq nunap inuisa immamiit miluumasunit mingussimasunit nerisaqartarnerat. ingammik puisinik arfernillu, taakkumi toqunartunik PCB-mik DDT-milu ulikkaarput hormoninik innarliisartunik.
Maannakkut misissuinermi annertuumi Syddansk Univertitetimi Statens Institut for Folkesundhedimi issittumi nunap immikkoortuini 27-ni inoorlaanit 3 millioninit paasissutissat misissorneqarsimapput, inerniliinerlu ersarippoq: Nukappiaqqat niviarsiaqqallu inunngortartut amerlassutsimikkut nikinganeqanngitsut, weekendavisen allappoq.
Kalaallit navianartorsiornerpaat ilagaat
Nunarsuaq tamakkerlugu nukappiaqqat niviarsiaqqallu nikingassut 1,05-uvoq, tamannalu aamma issuttumi tamarmi atuuppoq. Kalaallit Nunaat eqqarsaatigalugu nukappiaqqat niviarsiaqqallu inunngortartut amerlassutsimikkut nikinganeqanngillat 1900-kkut aallatinneranniit paasissutissat assersuukkaanni.
Nunap immikkoortuini 27-ni innuttaasut toqunartunit qanoq navianartorsiortinneqartiginerat assigiinneqaaq, tassani kalaallit navianartorsiornerpaallutik, taamaakkaluartorli sumiiffinni unoorlaat suliassutsimikkut nikinganeqaratik misissuineq naapertorlugu.
Taamaattumik ilisimatuut mianersortunnguamik inernilerpaat "mingutsitsinikkut toqunartut sunniutigisinnaasaat innuttaasunut sunniussimanngitsutut isikkoqartoq".