INI-mi pisortaq tunuarpoq
Kenneth T. Hansen inissiaatileqatigiiffiup INI A/S-ip allaffissornikkut pisortaatut tunuarpoq - siulersuisut siulittaasuata tamanna ajuusaaraa
- Inissiaatileqatigiiffiup INI A/S-ip allaffisornikkut pisortaa, Kenneth T. Hansen, atorfimminit tunuarnissani nammineq kissaatigisimavaa.
INI A/S ullaaq manna taamatut tusagassiuutinut nalunaaruteqarpoq.
- Inissiaatileqatigiiffimmi INI A/S-imi allaffissornikkut pisortatut atorfiga nuannarisimavara minnerunngitsumik ingerlatsiviup siulersuisui suleqatimalu suleqatigisimanerat nuannaraara. Atorfinnut atatillugu, Kalaallit Nunaanni ineqarniarnermut tunngasut assigiinngitsorpassuit pillugit suliaqartarnikuuvunga pissanganartunik. Siunissami ineqarnermut atatillugu suliassat pillugit inissiaatileqatigiiffiup ingerlanera patajaallisarnikuuarput.
- Allanngortiterineq aallatilluartoq takusinnaagakku nuannaarutigaara, tamatumalu naammassilluarneqarnissaa qularutiginngilara, Kenneth T. Hansen oqarpoq.
Siulersuisut siulittaasuat ajuusaarpoq
Siulersuisuni siulittaasup Erik J. Nørskov-ip Kenneth T. Hansen-imik suleqateqarsimanini imatut oqaluttuaraa:
- Ukiuni kingullerni marlunni ingerlatsiviup siulersuisuini siulittaasuuninni, Kenneth Hansen-ip suleqatiginera nuannarisimaqaara.
- Taamaammat Kenneth T. Hansen-ip soraarniutaa tigugakku ajuusaarpunga. Ukiuni kingullerni marlunni marluulluta amerlaqisunik unammilligassaqartarnikuuvugut. Ingerlatsivimmit siunniunneqartut periusissallu pillugit siulersuisunit Kenneth T. Hansen isumasioqatigilluartarnikuuarput, tamatumalu kinguneranik allanngortiterineq, ininik attartortut ukiuni aggersuni malugiumaagaat aallartilluarlutigu, Erik J. Nørskov oqarpoq.
Pisortamik nutaamik atorfinitsitsinissaq siulersuisut maanna aallartissavaat.
- INI A/S-imi allaffissornikkut pisortatut atorfik maanna inuttassarsiulissavarput. Qaammatit marluk/pingasut ingerlaneranni atorfinissinnaasumik nassaarsinnaanissarput naatsorsuutigaara, Erik J. Nørskov oqarpoq.