Nunatta Igasutsialaa
Igaffimmi ittup tullia Daniel Greve Rasmussen, Hotel Hans Egede ukioq 2011 igasutsialanngorpoq
Ukioq 2011 Kalaallit Nunaanni igasutsialattut toqqagaavoq igaffiup tullia Daniel Greve Rasmussen, Hotel Hans Egede, Nuuk.
Pointinik marluinnarnik siuaqqalluni Kalaallit Nunaanni pingasoriarluni igasutsialattut toqqagaasareersumit, Jeppe Ejvind Nielsen, Hotel Arctic, Ilulissat.
Ukiup Igasutsialaatut unammineq Inuilimi ingerlanneqarpoq.
Unammisitsineq oktobarimi ingerlanneqartussaagaluarpoq nerisassiornermilli ilinniarfiup allanngortiterluni ilaartornera pissutigalugu aatsaat maannakkut unammisitsineq ingerlanneqarpoq.
Unammisitsinermut peqataasussat amerlanerugaluarput kisianni soorlu Rune Collin Nuummi restaurant Nipisameersoq marloriarlunilu nunatsinni Igasutsialattut toqqagaasoq sila pissutigalugu Air Greenlandikkut aallariqqissinnaanngitsoq aatsaat pingasunngornermi Narsamut apuuppoq.
Narsamut apuukkami paasivaa kuffertini atortussanik imalik tammarsimasoq ajoraluartumillu peqataasinnaajunnaarnini nalunaarutigiinnarpaa.
Ippassaq unnukkut nerisassiornermik ilinniarfimmi nerersuartoqarpoq ullumilu peqataasut tamarmik angerlamut aallakaapput.