Ingiaqatigiillutik angalassanngillat
Umiarsuarnut Kalaallit Nunaata imartaani takornariartitsisartut isumannaallisaanermut maleruagassat ajoquteqanngitsut Danmark aamma Kalaallit Nunaat isumaqatigiissutigaat
Ineqarnermut, Attaveqarnermut angallannermullu naalakkersuisup Jens B. Frederiksen, danskit inuussutissarsiornermut ineriartortitsinermullu ministeriat Ole Sohn angusaqarfiulluartumik ataatsimeeqatigaa, tassanilu umiarsuarnut Kalaallit Nunaata imartaani sinersorlutik takornariartitsisartunut isumannaallisaanermut maleruagassat tunngavimmikkut ajoquteqanngitsut illuatungeriit isumaqatigiissutigaat.
- Tupinnanngilluinnartumik imarsiornerup isumannaatsuunissaa oqallisigineqarpoq. Ajunaarnersuarnik, januaarimi Italiami umiarsuup sinersorluni takornariartitsisartup Costa Concodia-p umiuneratut, maannamullu inuit 25-t ajunaarneranut kinguneqartup assinganik misigisaqarnissaq arlaannaataluunniit kissaatiginngilaa.
Imartatsinni sikutaqaqisumi umiarsuarni sinersorlutik takornariartitsisartuni isumannaallisaaneq pillugu oqallinnermi, ingiaqatigiilluni angalasarnissamik taasaq atuutsinneqalissanersoq piffissami sivisunerusumi sammineqarsimavoq, tamannalu umiarsuit sinersorlutik takornariartitsisartut ikinnerpaamik marluk, ajunaarnersuaqartillugu ikioqatigiittarnissaannik siunertaqarfiusumik ingiaqatigiittalernissaannik isumaqarpoq, Jens B. Frederiksen oqarpoq.
Nukiit annertuut piffissap sivisujaartup ingerlanerani IMO (Nunani tamalaani imarsiortut kattuffiat) aqqutigalugu imartani sikoqarluartuni ingiaqatigiilluni angalasarnissamut maleruagassanik atuutsitsilerniarlutik sulisimapput. Maleruagassat taamaattut atuutsinneqalerpata, tamatuma umiarsuit sinersorlutik takornariartitsisartut ikilingaatsiarnerinik kinguneqarnissaa takornariaqarnermik suliaqartut annilaangassutigisimavaat.
Takornariat umiarsuaat ikilinissaat
Suliaqartut taakkua annilaangassuteqarnerat Naalakkersuisut paasilluarsinnaavaat, tamannalu Jens B. Frederiksenip danskit inuussutissarsiornermut ineriartortitsinermullu ministeriannut Ole Sohnimut erseqqissaatigaa.
- Tamanna isumassarsiaalatsiaanngitsutut, aammalu umiarsuarnut sinersorlutik takornariartitsisartunut nunatsinni ineriartortissimasatsinnut akornuseerujussuartussatut isumaqarfigaarput. Ingiaqatigiilluni angalasarnissamut maleruagassat sinersorlutik takornariartitsisartunik umiarsuaatileqatigiiffiit Kalaallit Nunaata imartaani angalajunnaarluinnarnerinik kinguneqarsinnaammat annilaangassutigineqarsinnaavoq, tamannalu takornariaqarnitsinnut pitsaanngilluinnarpoq, Jens B. Frederiksen oqarpoq, erseqqissaatigaalu isumannaallisaanermut maleruagassavut sukkannersorujussooreersut.
- Kingullermik 2009-mi imartatsinni angalanissamut maleruagassat sukannernerulersippavut. Maleruagassat sukannernerulersinneqarneri ilaatigut umiarsuit sikusiornissamut qajannaallisarneqarsimasussaapput unnuakkullu sikusiornermut siumoortaatinik atuisartussaallutik. Tamatuma saniatigut umiarsuit ilisimasortaqartussaapput, issittup imartaani angalanermik misilittagaqartumik, Jens B. Frederiksen erseqqissaavoq.
Ataatsimiinnermi Ole Sohnip kalaallit isummersuutaat paasilluarpai, oqaatigalugulu ingiaqateqarluni angalasarnissamut maleruagassatut siunnersuutigineqartut maannakkorpiaq pisariaqanngitsut isumaqataalluni.
Illuatungeriit isumaqatigiipput, imarsiornerup isumannaatsuunissaata pitsanngorsartuarnissaa siunertaralugu upalungaarsimanerup pitsaanerpaamik qulakkeerneqarnissaa pillugu suleqatigiinnertik pitsaasoq ingerlaavartorlu ingerlateqqinniarlugu. Tamatumani nunap iluani upalungaarsimaneq aammalu nunat tamalaat Nunat Issittut Isumasioqatigiiffianni suleqatigiinnerat eqqarsaatigineqarpoq, Jens B. Frederiksen nassuiaavoq.
-Ingiaqatigiilluni angalasarnissap atuutsinneqalinnginnissaa, aammalu pisariaqanngitsumik sukannernerulersitsineq umiarsuit sinersorlutik takornariartitsisartunut annertuumik ajoqutaanissaa isumaqatigiissutigigatsigu nuannaarutigaara,” Jens B. Frederiksen naggasiivoq.