Facebook eqeeriartoqqileqaaq
Facebook ammarneqarsinnaanngoqqippoq qarasaasiakkut inuit naapittarfiat taanna iserfigineqarsinnaajunnaaraluarpoq
Inuit millionilippassuit pingasunngornermi ullaakkut inuit qarasaasiakkut naapittarfiannut Facebookimut iserniaraluarput. Maanna paasinarpoq atuisut danskiusut nittartakkamut tassunga isersinnaaleqqittut.
Pingasunngornermi ullaakkut arfineq-pingasut qeqqata missaanniit facebookimi nammineq allakkusutat iserfigineqarsinnaanngillat nunarsuarlu tamakkerlugu inuit oqaloqatigiittarfiat atorneqarsinnaagani, naak nunarsuarmi atuisut 800 millionit missaannikkaluartut.
Tamatuma nassataani inuit naapittarfianni allami Twitter ulapputtunnguaqarpoq. Tassani atuarneqarsinnaavoq facebook nunani makkunani England, Korea, Italien, Indien, Holland aamma Ruslandimimit atorneqarsinnaanngitsoq.
Frida Löwengren, Facebookip nunani avannarlerni oqaaseqartartua Ritzauimut oqarpoq pingasunngornermi ullaakkut ajornartorsiut paasineqartoq sumillu pissuteqarnersoq maanna misissorneqarluni.
- Ullaaq manna nalunaarfigineqarpugut Danmarkimi Facebookimut isersinnaanngitsunik ajornartorsiortoqartoq, Frida Löwengren oqarpoq.
- Susoqarsimanera suli iluamik paasinngilarput, oqaaseqartartoq oqarpoq.
Taamaattumik oqaatigineqarsinnaanngilaq qarasaasiakkut innarliiniartartunit akornusersorneqarsimanersoq.
Twitterimi oqaluuserineqarpoq qaraasiakkut innarliiniartartut Anonymous inuit naapittarfiannik taassuminnga akornusersuisoq. Suleqatigiit taakkua siornatigut qunusaarutiginikuuaat Facebook eqqorniarsarissallugu, oqaatsilli taakku suli uppernarsaatissaqanngillat.
Tamatuma saniatigut Facebookimit nalunaarutigineqarpoq nittartakkap aaqqissuunneqarnera allanngortinneqarnikuusoq taamaattumillu atorsinnaajunaarnera tamassuminnga aallaaveqarsinnaasoq.