Inuusuttut ilinniagaqarnissaannut ingerlatsiviit aqqutissiuuppaat

CSR Greenlandip aamma Foreningen Grønlandske Børnip suleqatigiinnerisigut inuusuttut amerlanerusut ilinniagaqartinneqassapput

- Ilinniagaqartitsineq ingerlatsiviit peqatigiinnermik akisussaaffiisa pingaarutillit ilagaat, pissutigalugu tamanna ingerlatsiviup siuariartornissaanut inuiaqatigiillu nalinginnaasumik ineriartornissaannut pingaaruteqarmat, Anne Mette Christiansen, CSR Greenland, oqarpoq. Ass.: Leiff Josefsen

CSR Greenlandip aamma Foreningen Grønlandske Børnip suliniut Sapiik suleqatigiissutigaat, tassuuna kalaallit inuusuttut amerlanerusut ilinniagaqarnissamik kajumissuseqalersinneqassallutik.

Taamaasiortoqarpoq CSR Greenlandip suliniutit pingaarnertut sammisaqarfimmiittut, piginnaassutsimik ineriartortitsineq ilinniagaqartitsinerlu tapersersorusummagit.

CSR Greenlandip ingerlatsiviit ilaasortani suliniummik tapersersuitikkusuppai taamaattumillu Nuummi Ilulissanilu ingerlatsiviit paasissutissiilluni ataatsimiinnernut qaaqqullugit.

- Ingerlatsivinnut piviusorujussuarmik periarfissaavoq illoqarfimmi inuiaqatigiinni sammisaqarfimmi pingaarutilimmi assigiinngissuteqartitsinissamut. Ilinniagaqartitsineq ingerlatsiviit isumaginninnikkut akisussaaffiisa pingaarutillit ilagaat, pissutigalugu tamanna ingerlatsiviup siuariartornissaanut nalinginnaasumillu inuiaqatigiit ineriartornissaannut pingaaruteqarmat, Anne Mette Christiansen CSR Greenlandimeersoq oqarpoq.

Inuusuttumiit inuusuttumut suliniut
Sapiik inuusuttuniit inuusuttunut suliniutaavoq, meeqqat atuarfianni atuartut angajulliit siunissamut isumallualersinniarlugit inuusuttunullu ilinniagaqarfinnut ingerlaqqitsinniarlugit. Tamanna pissaq sapaatip akunnikkaartumik peqatigiinnermik ilinniagaqarnermullu tunngasunik sammisaqartitsinikkut, tamatumani piumassutsiminnik ilitsersuisut atuartut kajumissaartarlugit siunissaminnik oqaluttuaqqullugit samminneqqullugillu, tamatumani ilanngullugit ilinniagaqarnermut periarfissat sinnattullu.

Ukiuni marlunni misiliutitut suliniutip takutissimavaa ilitsersuisoqarnikkut inuusuttut ilinniagaqarfinnut qinnuteqarnissaminnut kajuminnerulersut piumassuseqarnerulerlutillu.

Atuartut nunaqarfimmiut immikkut anguniarneqarput, misissuinerit takutissimammassuk tamakkua peqatigiinnikkut fagitigullu illoqarfimmi atuartoqatiminnit unammilligassaqarnerusut. Ilanngullugu suliniutip Kalaallit Nunaanni piumassutsimik sulineq nukittorsaqataaffigalugulu ineriartortitseqataaffigaa, tassa ilitsersuisut piumassutsiminnik sulimmata.

CSR Greenland-ip aamma Foreningen Grønladnske Børnip ingerlatsiviit kajumissaarpaat assigiinngisitseqqullugit, assersuutigalugu inuusuttup ataatsip arlallilluunniit Sapiik-mut peqataanerannut sponsoriullutik. Ingerlatsiviit aamma praktikkerfissanik tunniussisinnaapput, sulisutik kajumissaarsinnaavaat suliniummi piumassutsiminnik suleqqullugit imaluunniit inuusuttunut ininik atugassaqartitsillutik imaluunniit nerisaqartitsillutik.

Sapiik ukioq ataaseq suliniutitut ingerlanneqassaaq Sisimiuni Ilulissanilu juunip tungaanut, Nuummilu Qaqortumilu 2013-imi juunip tungaanut ingerlanneqassallutik. Suliniut ingerlanneqassaaq naalakkersuisut, namminersorlutik oqartussat kommunillu suleqatigalugit.

Nuummi Ilulissanilu paasissutissiilluni ataatsimiinnerit
Ippassaq marlunngormat Nuummi Kalaallit Nunaanni Sulisitsisut Peqatigiiffiat paasissutissiilluni ataatsimiititsivoq, tassanilu peqataapput Stark, KPMG, Katuaq, Tele Greenland, ittu.net, Air Greenland, KNI, Arctic Group aamma Grønlandsbanken.

Aamma Ilulissani ingerlatsivinnik paasissutissiilluni ataatsimiititsisoqassaaq aqagu sisamanngornermi nal. 16.30, Hotel Icefiord-imi.

Powered by Labrador CMS